"முஸ்லிம்கள் உயிர்த்தெழ, வேண்டிய தருணம்"

அரசியலமைப்பு மாற்றம் தொடர்பான வாதங்கள் சூடுபிடிக்கத் தொடங்கியிருக்கின்றன. நாடு முழுவதும் இது தொடர்பான கருத்துக் கணிப்புக்கள் நடைபெற்று வருகின்றன. மக்களது பங்களிப்புடன் செய்யப்பட வேண்டிய இந்த மாற்றங்கள் தொடர்பில் முஸ்லிம் சமூகம் தொடர்ந்தும் அலட்சியமாகவே இருந்து வருகிறது.

தமது விவகாரங்கள் அனைத்தையும் அரசியல்வாதிகளே பார்த்துக் கொள்வார்கள் என்ற மூடத்தனமான நம்பிக்கையிலிருந்து சமூகம் இன்னமும் மீண்டதாகத் தெரியவில்லை. வழமைபோல முஸ்லிம் கட்சிகள் தாம் செயற்பாட்டில் இருப்பதாக சமூகத்துக்குப் பாசாங்கு காட்டுவதற்காக வேண்டி சுற்றுப் பேச்சுவார்த்தைகளை ஆரம்பித்திருக்கின்றன. நாட்டிலுள்ள மக்களை விட்டு விட்டு வெளிநாடுகளில் ஆலோசனை கேட்பதற்காக சில கட்சிகள் சுற்றுலாக்களை தொடங்கியிருக்கின்றன.

புதிய அரசியலமைப்பு மாற்றம் வரப்போவதனால் பாராளுமன்றத்துக்கு இது தொடர்பில் தெளிவுள்ளவர்களை அனுப்ப வேண்டும் என பாராளுமன்றத் தேர்தலின்போது சமூகம் தயாராகவே இருந்தது. ஆனாலும் பொருத்தமானவர் களை தேர்தலுக்காக தெரிவுசெய்யாமல் அரசியல் கட்சிகள் விட்ட தவறை, அரசியல் மாற்றத்துக்கான தற்போதைய கருத்தாடல்களின்போது சமூகம் உணர்ந்து கொண்டுள்ளது.

இதுதான் முஸ்லிம்களின் சிவில் நிறுவனங்கள் உயிர்த்தெழ வேண்டிய தருணம். அரசியலமைப்பு தொடர்பான தெளிவுகளைப் பெறுவதற்கு அரசியல்வாதிகளை நம்பி ஏமாந்து போயுள்ள சமூகம், சிவில் நிறுவனங்களில் பெரும் எதிர்பார்க்கைகளை வைத்து காத்துக் கொண்டிருக்கிறது. இனி இது தொடர்பில் இந்த அரசியல்வாதிகள் அலசுவார்கள் என்ற நம்பிக்கை சமூகத்திற்கு இல்லை.

அல்குர்ஆன்தான் சட்ட யாப்பு என்று கூறிய அரசியல் கட்சிகள், இஸ்லாத்தின் அல்குர்ஆனை படிப்பிக்கவுமில்லை. இலங்கையின் அரசியல் யாப்பினை கற்றுத் தரவுமில்லை. இந்த நிலையில் தாம் ஆளப்படுகின்ற அரசியல் யாப்பு தொடர்பில் முஸ்லிம் சமூகத்தினது அறிவு ஏனைய சமூகங்களை விட மிகவும் குறைவாகவே காணப்படுவது கவலைக்கிடமானது.

ஒற்றையாட்சி, சமஷ்டி முறைமை, முஸ்லிம் தேசியம் என்ற எண்ணக்கருக்கள் பற்றிய எந்தவிதமான தெளிவும் பெரும்பாலான முஸ்லிம்களிடம் இல்லை. இந்த நிலையில் எமது பிரச்சினைகளுக்கான தீர்வு ஒற்றையாட்சியில் கிடைக்குமா அல்லது சமஷ்டி முறையில் கிடைக்குமா என்பதானதொரு கேள்வியை முஸ்லிம் சமூகத்திடம் கேட்பதே அபத்தமானதாகத் தெரிகிறது.

இங்குதான் சிவில் நிறுவனங்களின் பங்களிப்பு வேண்டி யிருக்கிறது. முடிந்த முடிவுகளை நோக்கி அரசியல் மாற்ற செயற்பாடுகள் நகர்வதாகத் தெரிந்தாலும் தமது இருப்பையும் பாதுகாப்பையும் உத்தரவாதப்படுத்திக் கொள்வதற்கான பொறிமுறையை அரசியல் அமைப்பில் உட்படுத்துவதற்கான முயற்சியையாவது சமூகம் செய்தாக வேண்டியிருக்கிறது.

முஸ்லிம் சமூகம் எதிர்நோக்கியுள்ள வெறுப்புணர்வுப் பிரச்சாரங்களுக்கும், இருப்புக்கு எதிரான அச்சுறுத்தல்களுக்குமான தீர்வினை மாறி மாறி வருகின்ற அரசாங்கங்களிடம் கெஞ்சிக் கேட்டுப் பெற்றுக் கொள்வதனை விட அரசியலமைப்பிலேயே அதனை உறுதிசெய்து கொள்வதற்கான ஓர் அரிய சந்தர்ப்பம் தமக்கு வாய்த்திருப்பதை சமூகம் உணராமலிருக்கிறது. சிவில் நிறுவனங்களின் பணி இங்கிருந்து தொடங்க வேண்டும்.

ஊருக்கு ஊர், தெருவுக்குத் தெருவாகச் சென்று எமது மக்களை இது தொடர்பில் அறிவூட்ட வேண்டியது இவர்களது கடமையாகும். ஏனெனில் உத்தேச அரசியல் மாற்றம் தொடர்பில் மக்களது கருத்து பெறப்பட்டு, அது பாராளுமன்றத்தில் விவாதத்துக்கு எடுக்கப்படவிருக்கிறது. பாராளுமன்றத்தில் எமது அரசியல் ஞான சூன்யங்களைக் கடந்து இது அங்கீகரிக்கப்பட்டாலும் மக்களது இறுதிச் சந்தர்ப்பமாக சர்வசன வாக்கெடுப்பு நடக்கவிருக்கிறது.  அது வரையில் மக்களை விழிப்பூட்டுகின்ற தொடரான பணி சிவில் நிறுவனங்களால் நடத்தப்பட வேண்டும்.

அரசியலமைப்பு மாற்றத்தை தேர்தல் முறை மாற்றங்களுடன் பிசைந்து போட்டுக் கொண்டு, தலையைப் பிய்த்துக் கொள்கின்ற அளவுக்கு சில சமூகத் தலைமைகளும் குழம்பிப் போயிருக்கின்ற சூழலில், அரசியல்வாதிகளில் மொத்தமாகவே மக்கள் நம்பிக்கையற்றுப் போயிருக்கின்ற சூழலில், சமூகத்தை விழிப்பூட்டிக் காப்பாற்ற வேண்டிய பணியை சிவில் அமைப்புக்கள்தான் செய்ய வேண்டியிருக்கிறது.

இலங்கை முஸ்லிம் சமூகத்தைப் பொறுத்தவரையில் ஏராளமான சிவில் அமைப்புக்கள் இருந்தபோதிலும், அவை அரசியலால் வளைத்துப் போடப்பட்டு, சமூகத்தில் செல்வாக்கிழந்தவைகளாகவே இருக்கின்றன. தமக்கு முதுகெலும்பு இருக்கிறது என்பதனை சமூகத்துக்கு நிறுவிக் காட்ட அவற்றுக்கு ஒரு சந்தர்ப்பம் வாய்த்திருக்கிறது.

-MEELPARVAI-