யாழ் பல்கலைக்கழக முஸ்லிம் மாணவர்களை, வழமைபோன்று வரும்படி துணைவேந்தர் அழைப்பு (வீடியோ)

-பாறுக் ஷிஹான்-

யாழ் பல்கலைக்கழக கலைப்பீடாதிபதியினால்  வெளியிடப்பட்டுள்ள சுற்று நிருபத்தினால் பல்கலைக்கழக  முஸ்லீம் மாணவர்களுக்கு எவ்விதத்திலும் பாதிப்பில்லை என  துணைவேந்தர் பேராசிரியர்  வசந்தி அரசரட்ணம் தெரிவித்துள்ளார்.

வட மாகாண சபை உறுப்பினர் றிப்கான்  பதியுதீன்  தொலைபேசி ஊடாக துணைவேந்தரிடம் இவ்விடயம் தொடர்பாக  விடுத்த வேண்டுகோளின்படி துணைவேந்தர் மேற்கண்டவாறு பதிலளித்துள்ளார். எனவே எவ்வித அச்சமுமின்றி வழமைபோன்று முஸ்லீம் மாணவர்கள் விரிவுரைக்கு சமூகம் அழிக்குமாறு கேட்டுள்ளார்.

இதேவேளை கருத்து தெரிவித்த துணைவேந்தர்,

பல்கலைக்கழகத்தில் உள்ள பீடங்களில் உள்ள துறைத்தலைவர்களுடனான சந்திப்பினை அடுத்து மேற்படி சுற்று நிருபத்தை  தவறாக கலைப்பீடாதிபதி வெளியீட்டுள்ளார்.

இச்சுற்று நிருபத்தில்  மாணவர்களுக்கு ஒழுங்கு விதிகள் மற்றும் கட்டுப்பாடுகள் புதிதாக அறிமுகப்படுத்தப்பட்டன.

ஆனால் சேலை சாரி தொடர்பாக எவ்வித முடிவும் அதில் எட்டப்படவில்லை. இதனை கலைப்பீடாதிபதியே தவறாக அணுகி இவ்வாறாக  சுற்றுநிருபம் ஒன்றினை வெளியிட்டதாக குற்றம் சாட்டி உள்ளார்.

ஆனால் கலைப்பிடாதிபதியின் கையொப்பத்துடன் உள்ள துண்டு பிரசுரத்தில் மாணவர்கள் மற்றும் கல்வி சார் உத்தியோகஸ்தர்கள் டெனிம் மற்றும் ரி-சேர்ட் என்பவற்றை விரிவுரை நடைபெறும் நேரத்தில் அணிந்து இருப்பதை தவிர்த்தல். ஒவ்வொரு வெள்ளிக்கிழமைகளிலும் பெண்கள் சேலை அணிந்து விரிவுரைகளில் பங்கேற்க வேண்டும். தாடியுடன் விரிவுரைக்கு சமூகமளிக்க கூடாது. ஆகிய கட்டுப்பாடுகள் புதிதாக அறிமுகப்படுத்தப்பட்டு உள்ளன.

இவை யாழ்.பல்கலைகழக பேரவையின் அறிவுறுத்தலுக்கு அமைய அனைத்து மாணவர்களினதும் உடை ஒழுங்குகள் பற்றி கடந்த 16ம்  திகதி துறை தலைவர்களுக்கு இடையிலான கூட்டத்தில் ஆராயப்பட்டு குறித்த ஒழுங்கு விதிகள் கட்டுப்பாடுகள் விதிப்பதென தீர்மானங்கள் எடுக்கப்பட்டு உள்ளன என அதில் குறிப்பிடப்பட்டுள்ளது.

இவ்விடயத்தை கேள்விப்பட்ட  முஸ்லீம் மாணவர்கள் அதிர்ச்சியடைந்து விரிவுரையை பகிஸ்கரிக்க எண்ணி இருந்தனர். ஆனால் தற்போது வட மாகாண சபை உறுப்பினர் றிப்கான் பதியுதினின் தலையீட்டினால் இச்சுற்று நிருபம் முஸ்லீம் மாணவர்களிற்கு இல்லை என துணைவேந்தர் மறுத்துள்ளார்.

அத்துடன் சிங்கள மாணவர்களுக்காகவே இவ்வாறான சுற்றுநிருபம் பொருந்தம் என மாகாண சபை உறுப்பினரிடம்   மேலும் குறிப்பிட்டுள்ளார்.

மேலும்  இப்பல்கலைக்கழகத்தில் முஸ்லீம் சிங்கள மாணவர்கள் கல்வியினை தொடர்கின்றனர்.இவர்களில்  சுமார் 500க்கு அதிகமான முஸ்லீம் மாணவ மாணவியர்கள் உள்ளனர்.இவர்களில் பலர் கலைப்பீடத்தில் பல்வேறு துறைகளில்  உள்ளனர். முஸ்லீம் மாணவர்களிற்கு என முஸ்லீம் மஜ்லீஸ் என்கின்ற அமைப்பு இயங்கி வருகின்றமை குறிப்பிடத்தக்கது.

(வீடியோ)