குரல் கொடுக்கும் பிக்குகள், விளக்கமறியலில் வைக்கப்பட்டுள்ளதாக கவலை

அரசாங்கம் கடுகளவேனும் அபிவிருத்தியை மேற்கொள்ளவில்லை என, முன்னாள் ஜனாதிபதி மஹிந்த ராஜபக்ஷ தெரிவித்துள்ளார்.

இன்று (18) பாரிய ஊழல் மற்றும் மோசடிகள் தொடர்பில் விசாரணை செய்யும் ஜனாதிபதி ஆணைக்குழுவுக்கு வாக்குமூலம் அளிக்க வந்த வேளை, ஊடகவியலாளர்களிடம் கருத்து வௌியிட்ட போதே அவர் இவ்வாறு கூறியுள்ளார்.

தனது ஆட்சிக் காலத்தில் நுரைச்சோலை மூன்று கட்ட மின் உற்பத்தி, அதிவேக வீதி, துறைமுகம், விமான நிலையம் போன்றவற்றை நிர்மாணிக்க செலவான மில்லியன் அளவிலான பணத் தொகை, இந்த அரசாங்கத்தால் நுகர்வுக்காக மட்டுமே செலவிடப்பட்டுள்ளதாக மஹிந்த ராஜபக்ஷ கூறியுள்ளார்.

இந்த ஆட்சியில் தொலைக்காட்சிகள் மூடப்பட்டுள்ளதாகவும், எதிரணிக்கு ஏசும் தொலைக்காட்சிகள் மட்டுமே உள்ளதாகவும், குரல் கொடுக்கும் பிக்குகள் விளக்கமறியலில் வைக்கப்பட்டுள்ளதாகவும், வேலை கோருபவர்களுக்கு கண்ணீர் புகை வீசுவதாகவும், அபிவிருத்தி என்ற போர்வையில் கொழும்பு மக்களை வெளியே இழுத்து விடுவதாகவும் அவர் தெரிவித்துள்ளார்.

தனது காலத்தில் மக்களை வீதியில் இறங்கிவிட்டு அபிவிருத்திகளை மேற்கொள்ளவில்லை எனவும், முன்னாள் ஜனாதிபதி இதன்போது மேலும் குறிப்பிட்டுள்ளார்.