முஸ்லிம்கள் கொண்டாடிய சுதந்திர தினம், திசை மாறிச் சென்றதா..?

-அப்துல் ஹபீழ்-

கடந்த காலங்களை விட இந்த வருடம் சுதந்திர தினக் கொண்டாட்டம் வெகு விமரிசையாக முஸ்லிம்களால் கொண்டாடப்பட்டதைக் காண முடிந்தது. அரசாங்கத்தின் கீழ் இயங்கும் பாடசாலைகள், அலுவலகங்களில் சுருங்கிப் போய் இருந்த சுதந்திர தினக்கெண்டாட்டம் திடீரென பள்ளிவாயல்கள், அரபுக் கல்லூரிகள், ஜம்இய்யதுல் உலமா கிளைகள் அனைத்தையும் ஆக்கிரமித்துவிட்டன.

தேசத்தை வணங்கும் நமோ நமோ கீதம் முஸ்லிம்களின் பக்திப் பாடலாய் ஒலிக்கின்றது.

ஏன் இந்த மாற்றம்? இலங்கை வரலாற்றில் முன் சென்ற முஸ்லிம்களிடம் இல்லாத தேசபக்தி நம்மிடம் தலைக்கேறிவிட்டதா? இல்லை பெரும்பான்மை சமூகத்திலுள்ள சில இனவாதிகளின் பொய்ப்பிரச்சாரம் முஸ்லிம் சமூகத்தை நடுங்கச்செய்து விட்டதா? அல்லாஹ்வின் பூமியில் கிறிஸ்தவ காலனித்துவத்திலிருந்து விடுதலைபெற்று ஒரு பௌத்த தேசம் உருவானதையிட்டு முஸ்லிம்களுக்கு இவ்வளவு மகிழ்ச்சியா?

இல்லை இல்லை தேசப்பற்றை வெளிப்படுத்தவே நாம் இவ்வாறு செய்தோம் என்றால் ஒரு முஸ்லிம் தனது பிரதேசத்தின் மீதான பற்றை வெளிப்படுத்த ஒரு கொண்டாட்டத்தை ஏற்படுத்திக்கொள்ளும் வழிமுறையை இஸ்லாமிய வரலாற்றுப் பாரம்பரியம் நமக்கு வாழிகாட்டவில்லை என்பதை முதலில் நாம் புரிந்து கெள்ளவேண்டும். வருடம் ஒரு முறை மட்டும் தேசப்பற்றை வெளிப்படுத்துகின்றோம் என்ற பெயரில் அந்நியர்கள் உருவாக்கித்தந்த தேசிய தினத்தை நாம் ஏன் கொண்டாட வேண்டும்? எல்லாவற்றிலும் தனித்துவமான இறைவழிகாட்டலைப் பெற்ற நாம் மனித மாயைகளுக்கு ஏன் அடிபணியவேண்டும்?

இஸ்லாத்தின் தலைநகரான மக்காநகர் அல்லாஹ்வை மட்டும் வணங்கும் ஏகத்துவ தேசமாக எப்போது மாறும் என்ற ஏக்கத்திலிருந்த நபி ஸல்லல்லாஹு அலைஹி வஸல்லம் அவர்கள் மக்கா வெற்றியின் மூலம் இணைவைப்பிலிருந்து மக்காவை மீட்டு முஸ்லிம்களின் கையில் ஒப்படைத்தார்கள். மக்காவை அதிகம் நேசித்த அவர்கள் அந்த தேசப்பற்றை வெளிப்படுத்த மக்கா வெற்றிகொள்ளப்பட்ட தினத்தை மக்காவின் தேசிய தினமாக அறிமுகப்படுத்தவில்லை. ஒவ்வொரு முஸ்லிமும் தன்னைச் சுற்றி வாழும் மக்களுடன் எப்போதும் ஐக்கியத்துடனும், நல்லிணக்கத்துடனும் வாழவேண்டும். நீதியையும், நேர்மையையும் வாழ்வின் சகல மட்டங்களிலும் கடைப்பிடிக்க வேண்டும். 

இதுவே உண்மையான தேசப்பற்றின் வெளிப்பாடாகும். வருடம் ஒரு முறை தேசியக் கொடி முன்னே நின்று விட்டு, அணிவகுப்பு நடத்திவுட்டு, மேள தாளங்கள் வாசித்துவிட்டு பின்னர் ஊழல், அநீதி, அதிகாரத் துஷ்பிரயோகம், பொதுநிதி மோசடி போன்ற தேசத் துரோகச் செயல்களில் ஈடுபடுவோர்கள் மத்தியில் நாம் தனித்துவமாக செயலாற்றவேண்டும்.

அந்நிய பெரும்பான்மை சமூகத்தை திருப்திப்படுத்த தேசிய கீதம் பாடி அதனை கௌரவித்து தேச வணக்கம் புரியும் முஸ்லிம் தலைமைகள், நாளை தேசப்பற்றை வெளிப்படுத்த மாடறுப்புத்தடையை அங்கீகரித்து எஞ்சியுள்ள ஹலாலையும் விட்டுக்கொடுக்கத் தயாராகிவிடமாட்டார்கள் என்பதற்கு எந்த உத்தரவாதமும் இல்லை.