தளுபத்தையில் விபத்து - அல் பலாஹ் மாணவன் வபாத் 4 பேர் காயம் (படங்கள்)

-முஸாதிக் முஜீப்-

காருடன் கார்நேருக்குநேர் மோதியதில் பாடசாலை மாணவன்  ஒருவன் மரணமாகியுள்ளதோடு  மேலும் நான்கு மாணவர்கள் வைத்தியசாலையில் அனுமதிக்கப்பட்டள்ளனர். இவர்களில் ஒருவர்  கடும் காயங்களுக்கு உள்ளான நிலையில்  கொழும்பு தேசிய வைத்தியசாலையில் அனுமதிக்கப்பட்டுள்ளார்.

இந்த விபத்துச் சம்பவம் கடந்த வியாழக்கிழமை (4) மாலை 5.30 மணியளவில்  நீர்கொழும்பு – சிலாபம் பிரதான வீதியி;ல்  தளுபத்தை பிரதேசத்தில் இடம்பெற்றுள்ளது. இந்த சம்பவத்தில்  போருதொட்டை பிரதேசத்தைச் சேர்ந்த  முஹம்மத் சிபான் என்ற 17 வயதுடைய மாணவரே மரணமடைந்தவராவார். இவர்  நீர்கொழும்பு அல் பலாஹ் முஸ்லிம் வித்தியாலயத்தில் கடந்த வருடம் கல்விப் பொதுத் தராதர சாதாரண தரப் பரீட்சை எழுதிவிட்டு பெறுபேற்றை எதிர்பார்த்திருப்பவராவார். காயமடைந்த  ஏனைய மாணவர்கள் சர்வதேச பாடசாலை ஒன்றில் கல்வி கற்பவர்களாவர்.

சம்பவம் தொடர்பாக மேலும் தெரிய வருவதாவது,

பாடசாலை மாணவர்களான ஐவர் இணைந்து வாடகைக்கு வாகனம் ஒன்றை பெற்று பயணித்துள்ளனர். தளுபத்தை பிரதேசத்தில் வைத்து இவர்கள் பயணித்த வாகனம் எதிரே வந்த இன்னொரு காருடன் மோதி இந்த விபத்து இடம்பெற்றுள்ளது. விபத்தின் காரணமாக மாணவர்கள் பயணித்த வாகனம் பலத்த சேதமடைந்துள்ளது.

காயமடைந்தவர்கள் நீர்கொழும்பு மாவட்ட வைத்தியசாலையில் அனுமதிக்கப்பட்ட நிலையில் அதில் ஒருவர் மரணமாயிள்ளதோடு,இன்னொருவர் படுகாயமடைந்த நிலையில் கொழும்பு தேசிய வைத்தியசாலைக்கு மேலதிக சிகிச்சைக்காக கொண்டு செல்லப்பட்டார்.