ஜனாதிபதி செயலகத்துக்கு வந்த 2 ஊர்க் குருவிகள், விளக்குகளை அணைத்து விரட்டியடிப்பு

இலங்கைக்கு விஜயம்செய்துள்ள நியூசிலாந்து பிரதமர் ஜோன் கீ, தலைமையிலான குழுவினருக்கு, காலி முகத்திடலில் உள்ள ஜனாதிபதி செலயகத்துக்கு முன்பாக வைத்து நேற்று புதன்கிழமை செங்கம்பள வரவேற்பளிக்கப்பட்டதுடன் 19 வேட்டுகள் தீர்க்கப்பட்டு அரச மரியாதையளிக்கப்பட்டது. 

இவ்வாறான பிரமாண்டமான ஏற்பாடுகள் மேற்கொள்ளப்பட்டிருந்த நிலையில், ஜனாதிபதி செயலகத்துக்குள் இருக்கும் பழைய நாடாளுமன்றத்தின் அவைக்குள், காலை 9.30 மணியளவில் கியூக், கியூக், கியூக்...கியூக்...கியூக் என சத்தம் கேட்டது. அந்த சத்தம், அப்போது அவைக்குள் இருந்த ஊடகவியலாளர்கள் உள்ளிட்ட ஜனாதிபதி செயலக பணியாட்கள், பாதுகாப்பு பிரிவினரை முகஞ்சுழிக்கச் செய்துவிட்டது. 

விரைந்து செயற்பட்ட பாதுகாப்பு பிரிவினர், அவைக்குள் ஒளிர்ந்துகொண்டிருந்த சகல விளக்குகளையும் அணைத்து, மரவேலை (தச்சுவேலை) செய்யும் இரண்டொருவரை அழைத்து, அவையின் கூரைக்குக் கீழுள்ள ஜன்னலொன்றை திறந்து மிகவும் இலாவகரமான முறையில், அவ்விரண்டு ஊர்க்குருவிகளையும் விரட்டிவிட்டனர். அதற்கு பின்னரே, விளக்குகள் யாவும் ஒளிரவிடப்பட்டன. 

-அழகன் கனகராஜ்-