மாடறுப்பது தடை என்ற மைத்திரிக்கு எதிராக, முஸ்லிம்கள் அணிதிரள வேண்டும் - அஸ்வர் குமுறுகிறார்

உள்நாட்டில் மாடறுப்பை மட்டுப்படுத்தி வெளிநாடுகளிலிருந்து மாட்டிறைச்சியை இறக்குமதி செய்தல் தொடர்பாக ஜனாதிபதி மைத்திரிபால சிறிசேன வெளியிட்டிருக்கும் கருத்து தொடர்பில் முஸ்லிம் சமூகத்திடையே பெரும் அதிருப்தி ஏற்பட்டுள்ளது.

முன்னாள் அமைச்சர் அஸ்வர்

இலங்கையில் மாடறுப்பது முழுமையாக இல்லாமற் செய்யப்படுமென ஜனாதிபதி மைத்திரிபால சிறிசேன தெரிவித்துள்ள கருத்துக்கு எதிராக முஸ்லிம் அரசியல்வாதிகளும் இயக்கங்களும் புத்திஜீவிகளும் மக்களும் அகில இலங்கை ஜம்இய்யத்துல் உலமா சபையின் தலைமையில் அணிதிரள வேண்டுமெனவும் ஐக்கிய அணியாக ஜனாதிபதியைச் சந்தித்து முஸ்லிம்களின் மார்க்க கடமைகளை விளக்க வேண்டுமெனவும் முன்னாள் முஸ்லிம் கலாசார அமைச்சர் ஏ.எச்.எம். அஸ்வர் வேண்டுகோள் விடுத்துள்ளார்.

ஜனாதிபதி மைத்திரிபால சிறிசேன பயாகலையில் நடைபெற்ற பொங்கல் விழாவில் உரையாற்றுகையில் நாட்டில் மாடறுப்பை முழுமையாக இல்லாமற் செய்ய இறைச்சியையும் உணவுகளையும் வெளிநாட்டிலிருந்து இறக்குமதி செய்யுமாறு நிதி அமைச்சருக்கு உத்தரவிட்டுள்ளதாக தெரிவித்த கருத்துக்கு கண்டனம் தெரிவித்து வெளியிட்டுள்ள அறிக்கையிலேயே அஸ்வர் மேற்கண்டவாறு தெரிவித்துள்ளார்.

அவர் வெளியிட்டுள்ள அறிக்கையில் தொடர்ந்தும் தெரிவித்துள்ளதாவது,

ஜனாதிபதியின் இந்தத் தீர்மானம் முஸ்லிம்களைப் பொறுத்தவரையில் அதிர்ச்சிக்குரியதாகும். குர்பான், உழ்ஹிய்யா, அகீகா என்பன முஸ்லிம்களின் மார்க்க கடமையாகும். இந்தக் கடமைகள் குறித்து குர்ஆன் மற்றும் ஹதீஸில் குறிப்பிடப்பட்டுள்ளது.

இலங்கையில் இஸ்லாம் கால்பதித்தது முதல் உள்நாட்டு வெளிநாட்டு ஆட்சியாளர்கள் மாடறுப்புக்கு எவ்வித தடையும் விதிக்கவில்லை.

கடந்த கால அரசாங்கத்தின் ஆட்சிக்காலத்தில் குர்பான் கடமையின் போதும் ஏனைய சந்தர்ப்பங்களிலும் மாடுகளை கொண்டு செல்வதற்கு (போக்குவரத்து செய்வதற்கு) பொலிஸார் கட்டுப்பாடுகள் விதித்தபோது முஸ்லிம் அரசியல்வாதிகளான நாம் பசில் ராஜபக்ஷவை சந்தித்து பேச்சுவார்த்தை நடத்தி சுமூக முடிவுக்கு வந்தோம்.

பொலிஸ்மா அதிபர் இது தொடர்பாக பொலிஸ் நிலையங்களுக்கு அனுமதி வழங்குமாறு விசேட சுற்று நிருபம் அனுப்பி வைத்தார். மஹிந்தவின் காலத்தில் முஸ்லிம்களுக்கு அநியாயம் நடக்கிறது என்று கூக்குரலிட்டவர்கள் இன்று மௌனித்து இருக்கிறார்கள். இது கவலைக்குரியதாகும்.

அதனால் முஸ்லிம்கள் அனைவரும் ஜனாதிபதியின் தீர்மானத்துக்கு எதிராக அணி திரள வேண்டும்.

அரசியல் வேறுபாடுகளை மறந்து முஸ்லிம்களின் உரிமைக்காக குரல் கொடுக்க வேண்டும் என்று தெரிவிக்கப்பட்டுள்ளது.