காதி நீதவான்களாக பெண்களை, நியமிக்க கோருவது இஸ்லாத்திற்கு மாற்றமானது - மௌலவி முபாறக்

காதி நீதவான்களாக பெண்களையும் நியமிக்க கோருவது இஸ்லாமிய அடிப்படைகளுக்கு மாற்றமானதாகும் என முஸ்லிம் உலமா கட்சி தெரிவித்துள்ளது. இது பற்றி கட்சியின் தலைவர் மௌலவி முபாறக் அப்துல் மஜீத் தெரிவித்துள்ளதாவது,

இஸ்லாமிய காதி நீதித்துறை என்பது ஆங்கில நீதித்துறை போன்று வெறுமனே படிப்போடு சம்பந்தப்பட்டதல்ல. அது அறிவுபூர்வமானதும் குர்ஆன் ஹதீதோடும் சம்பந்தப்பட்டதுமாகும். பெண்கள் பெரும்பாலும் உணர்வுக்கு கட்டுப்பட்டவர்கள் என்பது உலகில் ஏற்றுக்கொள்ளப்பட்ட ஒன்று. பெண்கள் விவாகரத்து வழக்கின் நீதிபதிகளாக வரவேண்டும் என்றால் நாட்டில் இஸ்லாம் அல்லாத விவாகரத்துத்துறை உள்ளது. அதில் இணைந்து கொள்ளலாம். இஸ்லாம் என்ற பெயருடன் உள்ள முஸ்லிம் விவாக விவாகரத்து சட்டத்தில் பெண்கள் மட்டுமல்ல உலக நீதிச்சட்டம் படித்த சட்டத்தரணிகளை நியமிப்பது கூட இஸ்லாத்துக்கு மாற்றமான செயலாகும் என்பதை உலமா கட்சி தொடர்ச்சியாக சொல்லி வருகிறது.

இவ்வாறு நாம் கூறுவதன் மூலம் பெண்கள் திறமையற்றவர்கள் என்றோ கௌரவம் குறைந்தவர்கள் என்றோ பொருள் அல்ல. இஸ்லாத்தை பொறுத்த வரை ஆணை விட அதிக கௌரவத்தை பெண்ணுக்கே வழங்கியுள்ளது. ஒரு தந்தையை விட தாய்க்கு மூன்று  மடங்கு உயர்வுள்ளதாக முஹம்மது நபி (ஸல்) அவர்கள் மிக தெளிவாக சொல்லியுள்ளார்கள். அதே வேளை அந்தத்தாய் என்ற பெண்ணின் கடமைகள் என்ன தந்தை என்ற ஆணுக்குரிய கடமைகள் என்ன என்பதையும் நபிகளார் தெளிவு படுத்தியுள்ளார்கள். வீட்டை, நாட்டை, சமூகத்தை நிர்வகிக்கும் பொறுப்பை இஸ்லாம் ஆணின் தலையில் சுமத்தியுள்ளது.

பெண்களுக்குரிய கௌரவம் வேறு அவர்களை நீதவான்களாக நியமிப்பது என்பது வேறு. ஏதும் பிரச்சினைகளின் போது இரண்டு ஆண்களின்; சாட்சியத்தையும் இனனொரு ஆண் இல்லையென்றால் அவனுக்கு பதிலாக இரண்டு பெண்களின் சாட்சியத்தையும்  சாட்சியத்தையும் வேண்டி நிற்கும் இறை மார்க்கம் இது என்பதை சகலரும் பரிந்து கொள்ள வேண்டும். இறைவனின் கட்டளைகளில் நிச்சயம் நமக்கு தெரியாத பல நுட்பங்கள் இருக்கும்.

ஹுதைபிய்யா உடன்படிக்கையின் பின் நபிகளாரின் மனைவி உம்மு சலமா (ரழி) அவர்களின் ஆலோசனைப்படி நபியவர்கள் தீர்ப்பளித்தார்கள் என காண்கிறோம்.  ஆக பெண்ணின் ஆலோசனையை நபியவர்கள் கேட்டு விட்டு ஆணான நபியவர்களே அந்த தீர்ப்பை நீதிபதியாக நின்று தீர்ப்பளித்துள்ளார்களே தவிர தமது மனைவியை நீதிபதியாக அவரது ஆலோசனை பிரகாரமான அந்த தீர்ப்பை அறிவிக்கும்படி சொல்லவில்லை.

அதே வேளை நாம் பெண்களை காதி நீதவான்களாக நியமிக்க கூடாது என்றுதான் சொல்கிறோமே தவிர ஆலோசகர்களாக நியமிக்க வேண்டாம் என சொல்லவில்லை. தேவையென்றால் ஒவ்வொரு காதிக்கும் பெண் தரப்பில் வாதிடும் பெண் ஆலோசகரை நியமிப்பதில் எம்மிடம் எதிர்ப்பில்லை.

ஆகவே காதி நீதிவான்களாக பெண்கள் நியமிப்பதை வலியுறுத்துவது இஸ்லாத்துக்கு முரண்பாடானது என்பதுடன் இந்நியமனத்தின் போது பல்கலைக்கழக பட்டம் பெற்ற மௌலவிமாருக்கு முதன்மை வழங்கும் சட்டத்திருத்தம் கொண்டு வரப்பட வேண்டும் என்றும் உலமா கட்சி கேட்டுக்கொள்கிறது.