"மாட்டிறைச்சிக் கடைகளை, தடை செய்யுங்கள்"

யாழ்ப்பாணத்திலிருந்து வெளியாகும் வலம்புரி பத்திரிகையில் இன்று எழுதப்பட:டள்ள ஆசிரியர் தலையங்கம்-

இன்று பட்டிப்பொங்கல். தைப் பிறப்பின் முதல் நாள் சூரியப்பொங்கல். இரண்டாம் நாள் பட்டிப் பொங்கல். உழுது வேளாண்மை செய்யும் உழவர்கள் இந்த உலகத்திற்கே உணவைக் கொடுப்பவர்கள். அதனால்தான் உழுதுண்டு வாழ்வாரே வாழ்வார் என்று சொல்லப்படுகிறது.

உலகத்துக்குத் தேவையான உணவை உற்பத்தி செய்து வழங்குகின்ற விவசாயப் பெருமக்கள் என்றும் போற்றுதற்குரியவர்கள்.

இவ்வாறு போற்றுதலுக்குரிய விவசாயிகளில் தமிழினம் சார்ந்த வேளாண் செய் விவசாயிகளிடம் இருக்கக்கூடிய மிக உயர்ந்த குணம் நன்றி மறவாமையாகும்.

தமது உழவுத்தொழிலுக்கு உதவியாக இருந்த கதிரவனுக்கு நன்றி செலுத்தும் வகையில் தை மாதப்பிறப்பில் சூரியக் கடவுளுக்குப் பொங்கல் படைத்து தமது நன்றியைத் தெரிவித்துக்கொள்கின்றனர்.

தை மாதப்பிறப்பில் இடம்பெறும் சூரியப்பொங்கலை தைப்பொங்கல் என்று புகழ்ந்து பேசும் நாம் அதனை தமிழர் திருநாளாகவும் கொண்டாடுகின்றோம்.

சூரியனுக்காக செய்யப்படும் தைப்பொங்கலைத் தமிழர் திருநாள் என்று போற்றுவதற்குள் தமிழர்கள் நன்றி மறக்காதவர்கள். ஒருவர் செய்த நன்றியை பெரிதாக மதிக்கின்ற பண்பாடுடையவர்கள் என்ற உண்மை புலப்படும்.

நன்றி உணர்வோடு செய்யப்படும் சூரியப்பொங்கலை தமிழர் திருநாள் என்று போற்றுவதற்குள் தமி ழர்களின் நன்றி உணர்வு வெளிப்படுகிறது என்பதை ஏற்றுக்கொள்வதில் கடினம் இருக்கமுடியாது.

அதேநேரம் ஏனைய இனத்தவர்களும் தைப் பொங்கல் விழாவை கொண்டாடுவதில் ஆர்வம் காட்டுவதற்குள் தமிழர் திருநாளின் தத்துவம் உணரப்படுவதை அறிய முடியும்.

தமது விவசாயத்துக்கு உறுதுணையாக இருந்த சூரியனுக்குப் பொங்கல் படைத்து தைத் திங்களை அன்போடும் குதூகலத்தோடும் வரவேற்ற தமிழ் மக்கள் இன்று பட்டிப்பொங்கலை செய்கின்றனர்.

விவசாயத்துக்கு மாடுகள் செய்யும் உதவியை நினைந்து பட்டிப்பொங்கல் செய்யப்படுகின்றது. மாடு என்றாலே செல்வம் என்று பொருள்படும்.

ஒரு காலத்தில் விவசாயிகளின் மிகப்பெரும் செல்வமாக மாடுகளே இருந்தன. அதனால் மாடு என்பது செல்வம் என்று பொருள்படலாயிற்று.

பசுவைத் தெய்வமாகப் போற்றும் தமிழ்ப் பண்பாட்டில் பெற்றதாய்க்கு அடுத்த படியாக பசுவை தாயாகப் போற்றுகின்ற பெரும்தன்மை, நன்றி என்ற எல்லை கடந்து ஜீவகாருணியத்துக்கான அடையாளமாகவும் கருதிக் கொள்ளமுடியும்.

இவ்வாறாகப் பசுவைத் தெய்வமாகப் போற்றி, தை மாதத்தின் இரண்டாம் நாளில் பட்டிப்பொங்கல் செய்து தமது நன்றியைத் தெரிவித்துக் கொள்கின்றனர்.

இதற்கு மேலாக பசுச் சாணத்தை நீறாக்கி அதனை சிவசின்னமாக நெற்றியில் அணியும் சைவத் தமிழர் பண்பாடும் பட்டிப்பொங்கலுக்குள் புரையோட இருப்பதைக் காணமுடியும். இவ்வாறான சிறப்புடைய தமிழர் தாயகத்தில் மாட்டிறைச்சிக் கடை என்று பெயர்ப் பலகை சூட்டப்பட்டிருப்பது மிகவும் அபத்தமானது. எனவே தமிழர் தாயகத்தில் மாட்டிறைச்சிக் கடைகளை இல்லாதொழிக்க வேண்டியது அவசியமாகும்.

இதற்கு ஏனைய சமயத்தவர்களும் நிச்சயம் உதவி செய்வார்கள் என்று நம்பலாம். ஒரு இனத்தின்-சமயத்தின் நடைமுறைகளுக்கும் மரபுகளுக்கும் மதிப்புக்கொடுப்பது அவசியமாகும் என்ற அடிப்படையில் மாட்டிறைச்சிக் கடைகளை இல்லாது செய்வதற்கு உரியவர்கள் நடவடிக்கை எடுப்பது பட்டிப்பொங்கலை அர்த்தமுடையதாக்கும்.