முஸ்லிம் காங்கிரஸ், தலைவருக்கு விரும்பமில்லையா...??

-எஸ்.எம். றிஸ்வி ஓட்டமாவடி-

நல்லாட்சி அரசாங்கத்தினால் வாக்களிப்பட்ட விடயங்கள் நடைமுறைப்படுத்தப்பட்டு வரும் நிலையில் புதிய அரசியலமைப்பு மாற்றமும், பிரதேச எல்லை மீள்நிர்ணயம் என்பன சமீபகாலமாக சிறுபான்மையினரினால் பெரிதாக பேசப்படும் விடயமாக மாறியுள்ளது. முஸ்லிம் அரசியல் தலைவர்கள் இது தொடர்பில் எவ்வாறு செயற்பட போகின்றனர் என்ற கேள்விக் குறியிடுன் மக்கள் எதிர்பார்த்து கொண்டிருந்தனர். 

அகில இலங்கை மக்கள் காங்கிரஸின் தலைவர் அமைச்சர் றிஷாட்டின் அறிவிப்பு வெளியானது மேற்கூறப்பட்ட விடயங்களை சுட்டிக்காட்டி இந்த விடயங்களுக்காக முஸ்லிம் காங்கிரஸ தலைவர் ரஊப் ஹக்கீம் அவர்களுடன் இணைந்து பணியாற்ற தயார் என அவ் அறிக்கையில் குறிப்பிடப்பட்டிருந்தது. இந்த அறிவிப்பானது முஸ்லிம் அரசியலில் பெரிதும் ஒரு மாற்றத்தை ஏற்படுத்தும் என்றும், இந்த கால கட்டத்தில் அமைச்சர் றிஷாட் அவர்களின் இந்த அறிவிப்பானது முஸ்லிம்களுக்கு உரிய உரிமையை இலகுவாக வெற்றி பெறலாம் என்று முஸ்லிம் சமூகம் பெரிதும் எதிர்பார்த்து இருந்தது. ஏனெனில் தனித்தனியாக உள்ள இரண்டு கட்சியும் ஒற்றுமைப்பட்டு சில விடயங்களை முன்னெடுக்கும் போது இலகுவாக சாதித்து கொள்ளலாம் என்றும் இதற்கு அமைச்சர் ஹக்கீம் என்ன பதில் கூற போகின்றார் சமூகம் எதிர்பார்த்தது.

இவ்வாறான நிலையில் அமைச்சர் ஹக்கீம் அவர்களின் அறிக்கை வெளிவந்துள்ளது. அமைச்சர் றிஷாட்டின் அறிக்கைக்கு முற்றிலும் மாற்றமாகவும், சம்பந்தம் இல்லாத கருத்துக்களையும் அமைச்சர் ஹக்கீம் அறிக்கையில் கூறியிருந்தார். அதாவது அமைச்சர் றிஷாட்டுடன் இனைவதற்கு எந்த தேவையுமில்லை, நான் பாவம் பார்த்து தேர்தலில் கேட்க சந்தர்ப்பம் கொடுத்தவர் இன்று தேசிய தலைவர் என்று சொல்லுகிறார், இவரின் காலம் விரைவில் முடிவு பெறும் என்றும், மஹிந்தவுடன் சேர்ந்து கட்சியை அழிக்க நினைத்தவர் என்றும் குறிப்பிட்டுள்ளார்.

ஒரு சமூகத்தின் தலைவர் இவ்வாறு சம்பந்தமில்லாமல் கருத்துரைப்பது என்பது மிகுந்த வேதனைக்குரிய விடயமாகும். இந்த காலகட்டத்தில் அதுவும் பேரினவாதிகளின் கை ஓங்கி வரும் சந்தர்ப்பத்தில் எமக்குரிய உரிமைகளை வெற்றி காண்பதை வைத்துவிட்டு அவரை தலைவர் என சொல்வது பிழை, அவர் அப்படி செய்தார் இப்படி செய்தார் என்று அறிக்கை வெளியிட்டு இருப்பது மக்களை பெரிதும் ஏமாற்றத்திற்கு இட்டுச் சென்றுள்ளது. மேலும் இரண்டு தலைவர்களும் கடந்த ஊவா மாகாண சபை தேர்தலில் ஒற்றுமைப்பட்டு தேர்தல் கேட்டார்கள். தேர்தலுக்காக ஒன்று சேர்ந்த தலைவருக்கு ஏன் சமூகத்தின் உரிமைக்காக ஒன்று சேர முடியவில்லை என்பது இன்று சமூகம் முன்னுள்ள கேள்வியாகும். முஸ்லிம் தலைவர்களின் ஒற்றுமை பற்றி பேசி வரும் சமூக ஆர்வாலளர்களின் முயற்சி வெற்றியடையவே மாட்டாது என்பது முஸ்லிம் காங்கிரஸின் தலைவரின் அறிக்கை மூலம் ஊர்ஜிதப்பட்டுள்ளது.