முஸ்லிம்களின் கவனத்தை திசைதிருப்ப, கையாளப்பட்டுள்ள குள்ளநரி தந்திரம்..!

-மூத்த ஊடகவியலாளர் Mohamed Naushad-

ஜனாதிபதி மைத்திரிபால சிறிசேனவுக்கும், பொது பல சேனா முக்கியஸ்தர்களுக்கும் இடையிலான ஒரு இரகசிய சந்திப்பு அண்மையில் இடம்பெற்றுள்ளது. இதில் பேசப்பட்ட விடயங்கள் பரம இரகசியம். ஐனாதிபதி ஊடக தரப்பில் இருந்து இதுபற்றி எந்த அறிவிப்பும் இல்லை. இது வழமையானது. ஆனால் பொதுபல சேனா இந்த சந்திப்பு திருப்திகரமானதும் வெற்றிகரமானதும் என அறிவித்துள்ளது.

இந்த சந்திப்பின் பின் ஜனாதிபதியின் சில அறிவிப்புக்கள் யோசிக்க வைத்துள்ளன. முதல் அறிவிப்பு மாடுகள் அறுப்பது தடை செய்யப்படும் என்பது. அடுத்த அறிவிப்பு இலங்கையில் இடம்பெற்றதாகக் கூறப்படும் யுத்தக் குற்றங்கள் தொடர்பான விசாரணைகளினல் வெளிநாடுகளின் ஒத்துழைப்பை பெற வேண்டிய அவசியம் இல்லை என்பது. பிபிசிக்கு அண்மையில் சிங்களத்தில் வழங்கிய பேட்டியில் இது தெளிவாக சொல்லப்பட்டுள்ளது. இந்த விடயத்தில் ஜனாதிபதியின் முன்னைய நிலப்பாடு இதுவல்ல என்பது குறிப்பிடத்தக்கது. இந்த விடயம் இப்போதைக்கு முஸ்லிம்களுக்கு முக்கியமானதல்ல என்பதால் அதுபற்றி பிரிதொரு சந்தர்ப்பத்தில் ஆராயலாம்.

இப்போதைக்கு மாடறுப்பு தடை பற்றி பார்ப்போம். எமது சமுகம் இதுபற்றி அலட்டிக் கொள்வதையும் அவதானிக்க முடிகின்றது. உண்மையில் இது நாம் அலட்டிக் கொள்ளவோ கவலைபடவோ வேண்டிய ஒரு விடயமே அல்ல. இந்த துறையை வாழ்வாதாரமாகக் கொண்ட பலருக்கு ஏற்கனவே மகிந்த அரசில் ஆப்பு வைக்கப்பட்டுவிட்டது. அவர்கள் வேறு வழிகளை தேடிக்கொண்டு விட்டனர். எஞ்சி உள்ளவர்கள் சொற்ப தொகையினர்தான். அவர்களுக்கும் இறைவன் நிச்சயம் வேறு வழிகளைக் காட்டுவான்.

இந்த விடயத்தை நாம் கண்டு கொள்ளாமல் சிறிது காலம் விடுவோமானால் சம்பந்தப்பட்டவர்களே இதற்காக வருந்தும் நிலை நிச்சயம் ஏற்படும்.

காட்டில் வாழும் சிங்கம் புலி ஓநாய் போன்ற மிருகங்கள் மான் மரை போன்ற மிருகங்களை வேட்டையாடி வாழ வேண்டும் என்பது இயற்கை நியதி. கடலில் வாழும் திமிங்கிலம் சுறா என்பன சிறிய உயிரினங்களை உண்டுதான் வாழ வேண்டும். ஊர்வனங்களின் உயிர் வாழ்வும் இந்த இயற்கை நியதிக்கு கட்டுப்பட்டதுதான். இதை சரியாகப் புரிந்து கொள்ளாமல் அதில் கைவைத்தால் இயற்கை உயிர்நிலை சமநிலை பாதிக்கப்பட்டு மனிதன் அதன் விளைவுகளை சந்திக்க நேரிடும்.

மேலும் மாடறுப்பு என்பது இந்த நாட்டில் முஸ்லிம்களோடு மட்டும் சம்பந்தப்பட்ட விடயம் அல்ல. இறைச்சிக்காக மாடுகளை அறுப்பது முஸ்லிம்களாக இருக்கலாம். ஆனால் அவற்றை விற்பனை செய்வது முஸ்லிம்கள் மட்டுமா?

இந்த நாட்டில் ஒரு தினத்தில் அறுக்கப்படும் மொத்த மாடுகளின் இறைச்சிகளை தின்று தீர்ப்பவர்களும் முஸ்லிம்கள் மட்டும் அல்ல. எனவே இந்த விடயத்தை புத்திசாலித்தனமாக அனுகி நாம் இந்த முடிவை ஏற்று மெளனம் காத்தால் எமக்காக மற்றவர்கள் பேசும் நிலை நிச்சயம் ஏற்படும்.

இதில் ஹஜ் கால குர்பானி கடமை பிரதானமாக சுட்டிக் காட்டப்படுகின்றன. அதற்கும் மாற்று வழிகள் உள்ளன. அந்த மாற்று வழிகளை மக்களுக்கு தெளிவுபடுத்த வேண்டிய கடமை ஜம்மியத்துல் உலமாவை சார்ந்தது.

இலங்கையில் இப்போது மிகப்பரவலாக பேசப்படும் விடயம் உத்தேச அரசியல் யாப்பு யோசனைகள் பற்றியது. இதில் தமிழ் தரப்பு தனது கோரிக்கைகளை வென்றெடுக்க முனைப்புடன் செயற்படுகின்றது. ஆனால் முஸ்லிம் அரசியல் தரப்பு இதில் எந்த கவனமும் செலுத்தாமல் மாட்டிறைச்சிக்காக குரல் கொடுக்கத் தொடங்கியுள்ளது. இது மிகவும் கேவலமான நிலைமை. அரசியல் யாப்பு விடயங்களில் இருந்து முஸ்லிம்களின் கவனத்தை திசை திருப்ப கையாளப்பட்டுள்ள ஒரு குள்ள நரி தந்திரமே மாடறுப்பு தடை பற்றிய அறிவிப்பு.