சிங்களவர்கள் மத்தியில் இஸ்லாம் பற்றி, பிரச்சாரம் செய்வதை தடுக்கவேண்டும் - நீதிமன்றத்தில் கோரிக்கை

பௌத்த மதத்தை ஸ்ரீ லங்கா தவ்ஹீத் ஜமாஅத் எந்த இடத்திலும் நிந்தனை செய்யவில்லை. தவறுதலாக பேசப்பட்ட ஒரு விடயத்திற்காகவே இவ்வழக்கு தாக்கல் செய்யப்பட்டுள்ளது. நாம் பேசிய குறித்த விடயம் மனிதன் என்ற வகையில் தவறுதலாக பேசப்பட்ட ஒன்றாகும். இதற்காக கடந்த காலங்களிலேயே நாம் பகிரங்கமாக வருத்தம் தெரிவித்து விட்டோம். நீதி மன்றத்திலும் வருத்தம் தெரிவித்துள்ளோம். இதனைத் தாண்டி எக்காரணம் கொண்டும் மஹாநாயக்க தேரர்களிடம் மன்னிப்புக் கோர முடியாது என ஸ்ரீ லங்கா தவ்ஹீத் ஜமாஅத் சார்பில் இன்று (10) நீதிமன்றத்தில் தெரிவிக்கப்பட்டது.

தவ்ஹீத் ஜமாஅத் பௌத்த மதத்தை நிந்தனை செய்தது என்று குற்றம் சாட்டி பொது பல சேனாவினால் தவ்ஹீத் ஜமாஅத்திற்கு எதிராக பதிவு செய்யப்பட்ட வழக்கு கொழும்பு, புதுக்கடை பிரதான நீதவான் நீதி மன்றத்தில் இன்று மீண்டும் விசாரனைக்கு எடுத்துக் கொள்ளப்பட்ட போதே மேற்கண்டவாறு தவ்ஹீத் ஜமாஅத் சார்பில் விளக்கமளிக்கப்பட்டது.

ஸ்ரீ லங்கா தவ்ஹீத் ஜமாஅத் என்பது தீவிரவாத அமைப்பாகும். இவர்களை பொது பல சேனா மாத்திரமன்றி சில முஸ்லிம் அமைப்புகளும் எதிர்க்கின்றார்கள். இவர்கள் புத்தரை அவமதித்துள்ளார்கள். ஆகவே இவர்களுக்கு தண்டனை வழங்க வேண்டும். அண்மையில் இவர்கள் நடத்திய குர்ஆன் சிங்கள மொழி பெயர்ப்பு நிகழ்வில் வெளிநாட்டில் இருந்து கலந்து கொள்ளவிருந்த தீவிரவாதிகளில் ஒருவரை அஸாத் ஸாலியும் எதிர்த்தார். இவர்களின் சிங்கள மொழி பெயர்ப்பையும் வெளியிட வேண்டாம் என்றார். அத்துடன் இவர்கள் இஸ்லாம் பற்றி சிங்கள மக்கள் மத்தியில் பிரச்சாரம் செய்து வருகின்றார்கள் அதற்கும் நீதி மன்றம் தடையுத்தரவு பிரப்பிக்க வேண்டும் என்று பொது பல சேனா தரப்பில் ஆஜரான சட்டத்ததரணி தனது வாதத்தை முன் வைத்தார்.

ஸ்ரீ லங்கா தவ்ஹீத் ஜமாஅத் என்பது இலங்கையில் சட்ட யாப்புக்கு அமைவாக செயல்படும் ஒரு ஜனநாயக அமைப்பாகும். அதன் பிரச்சாரத்தை எவராலும் எக்காரணம் கொண்டும் தடை செய்ய முடியாது. அத்துடன் அஸாத் ஸாலி என்பவர் முஸ்லிம் சமுதாயத்தில் எவ்வித மரியாதையும் அற்ற, அநாகரீகமான, மக்களால் தூசுக்கும் கணக்கில் எடுக்கப்படாத ஒருவர். அவரை இந்த இடத்தில் ஆதாரம் காட்டி பேசுவது என்பது கேளிக் கூத்தான ஒன்றாகும். அல்-குர்ஆன் சிங்கள மொழி பெயர்பை வெளியிடுவதை தடை செய்ய வேண்டும் என்று கோரிக்கை வைப்பதற்கு அஸாத் ஸாலிக்கோ, அவரைச் சார்ந்தவர்களுக்கோ எவ்வித அருகதையும் இல்லை. நாம் எமது காரியங்கள் அனைத்தையும் சட்டத்திற்கு உட்பட்டே செய்து வருகின்றோம், எமது மார்க்கப் பிரச்சாரங்களை நாம் தொடர்ந்தும் முன்னெடுப்போம் என்று ஸ்ரீ லங்கா தவ்ஹீத் ஜமாஅத் தரப்பில் ஆஜரான சிரேஷ்ட சட்டத்தரணி சிராஸ் நூர்தீன் மற்றும் மைத்திரி குனரத்த ஆகியோர் நீதி மன்றத்தில் தெரிவித்தார்கள்.

ஸ்ரீ லங்கா தவ்ஹீத் ஜமாஅத்தின் பிரச்சாரத்தினால் நாட்டில் ஏதாவது பிரச்சினைகள், சிக்கல்கள் உண்டா? என கொழும்பு, குற்றத் தடுப்புப் பிரிவு (CCD) அதிகாரிகளிடம் நீதவான் கிஹான் பிலபிடிய கேள்வியெழுப்பினார். அதற்கு பதிலளித்த குற்றத் தடுப்புப் பிரிவின் அதிகாரி தவ்ஹீத் ஜமாஅத் அமைப்பினால் நாட்டில் எவ்வித பிரச்சினைகளோ, சிக்கல்களோ இல்லை என்று தெரிவித்தார்.

ஸ்ரீ லங்கா தவ்ஹீத் ஜமாஅத் சார்பாக ஜமாஅத்தின் தலைவர் சகோ. ரியாழ், துணை தலைவர் சகோ. பர்சான், பொதுச் செயலாளர் சகோ. அப்துர் ராசிக், பொருளாளர் சகோ. ரிழ்வான், துணை செயலாளர் சகோ. ரஸ்மின் மற்றும் சகோ. தவ்ஸீப் அஹ்மத் ஆகியோர் வழக்கில் ஆஜரானார்கள்.

சிரேஷ்ட சட்டத்தரணி ஷிராஸ் நூர்தீன், மற்றும் மைத்திரி குனரத்ன உள்ளிட்ட குழுவினர் ஸ்ரீ லங்கா தவ்ஹீத் ஜமாஅத் சார்பாக வழக்கில் ஆஜரானார்கள்.

வழக்கின் மேலதிக விசாரனை 11.02.2016 ம் திகதிக்கு மீண்டும் ஒத்தி வைக்கப்பட்டது.