ஜப்னா முஸ்லிமில் கொமன்ட் பண்ணும், முஸ்லிம் சகோதரர்களுக்கு..!

-அமீர் உமைத்-

அல்லாஹ்வின் சாந்தியும், சமாதானமும் உங்கள் அனைவர் மீதும் உண்டாவதாக.

நீங்கள் ஒவ்வொருவரும் ஒவ்வொரு பின்னணியைக் கொண்டவர்களாக, வெவ்வேறு சமூக, சூழல்களில் வாழ்பவர்களாக இருக்கக் கூடும். ஆனாலும் உங்களின் கருத்துக்களை உங்களது சமூக சூழலை சேர்ந்தவர்கள் மட்டுமே வாசிப்பதில்லை, எல்லோருமே வாசிக்கின்றார்கள்.

கொழும்பில் பல்லின மக்கள் மத்தியில் வாழ்கின்ற முஸ்லிமின் சமூக சூழலுக்கும், கிழக்கில் காத்தான்குடி போன்ற ஒரு முஸ்லிம் செறிவு நிறைந்த ஒரு சூழலில் வாழ்கின்ற முஸ்லிமின் சமூக சூழலுக்கும் பாரிய வேறுபாடு உண்டு. ஆனால், பொது ஊடகம் ஒன்றில் கருத்து எழுதும் பொழுது, அந்தக் கருத்து பொதுவான அனைவரது சிந்தனைக்கும் பொருத்தமானதாக அமைய வேண்டும்.

எனினும் இந்த இணையத்தளத்தில் கருத்து பதியும் சிலர், இஸ்லாத்தை பாதுகாக்கின்றோம் என்று நினைத்துக் கொண்டு மிகக் குறுகிய வட்டத்துக்குள் இருந்துகொண்டு கருத்து பதிந்து, இஸ்லாத்தை பற்றிய நல்ல எண்ணங்களைக் கூட பாதிப்படைய வைக்கின்றனர்.

நான் தலைநகரில் பல்வேறு இனத்தவர்கள், மதத்தவர்கள், அதிலும் குறிப்பாக தமிழை தாய்மொழியாக கொண்டவர்கள் பணியாற்றும் நிறுவனம் ஒன்றில் பணியாற்றுகின்றேன்.

ஜப்னா முஸ்லிம் தடை செய்யப்பட காலத்தில் இருந்து இந்த இணையத்தளம் எனது நிறுவன பணியாளர்கள் மத்தியில் பார்க்கப்படும் ஒரு இணையத்தளமாக இருந்து வருகின்றது.

இந்நிலையில், நிலவன் மக்ஸ் போன்ற சிலர் கேட்கும் கேள்விகளுக்கு பதில் சொல்கின்றோம் என்கின்ற போர்வையில் நம்மவர்கள் சிலர் பதியும் கருத்துக்கள் எதிர்மறையான விளைவுகளையே உண்டாக்குகின்றன என்பதை நிதர்சனமாக உணர்கின்றேன். எனது சக பணியாளர்களின் கருத்துக்களில் இருந்து இதனை தெளிவாக உணர முடியுமாக உள்ளது.

ஒரு விடயத்தில் பதில் தெரியாவிட்டால், சரியான பதிலை உண்மையாகவே தெரிந்த ஒருவரிடம் கேட்டு பதிவதே சரியாகும், அதனை விடுத்து கேள்வி கேட்டவரை டார்கெட் பண்ணுவது, அவரை குறிவைத்து தாக்கி மட்டம் தட்ட முயல்வது மிகவும் அநாகரீகமானது. ஏனெனில் பலபேர் இங்கே என்ன நடக்கின்றது என்பதை அவதானிக்கின்றனர் என்பதனை மறந்து விடக் கூடாது.

இஸ்லாம் உட்பட எல்லா மதங்களும், அரசியல் கட்சிகள், கொள்கைகள் போன்று பொது விடயங்கள் ஆகும், ஆகவே விமர்சனங்கள், கேள்விகள் எழுவது நியாயமே. அவற்றை நியாயமாக எதிர்கொள்ள வேண்டுமே தவிர, அநாகரீகமாக எதிர்கொள்ளக் கூடாது, ஏனெனில் இஸ்லாம் என்பது இறைவனின் இறுதி வேதம் ஆகும். இறைவனின் இறுதி வேதம், ஒரு சிலரின் அநாகரீகமான பதில்களால் பிழையாக சித்தரிக்கப் படுவதை மெளனமாக பார்த்துக்கொண்டு இருப்பது, பாவத்திற்கு துணை போவது போன்றதாகும். 

நபி (ஸல்) அவர்களுடைய காலத்தில் நபி அவர்களிடம் யூதர்கள், கிறிஸ்தவர்கள் பல்வேறு சிக்கலான கேள்விகளை கேட்டு இருக்கின்றனர், நபி (ஸல்) அவர்களும் அவற்றிற்கு பதில் சொல்லி இருக்கின்றார்களே தவிர, கேள்வி கேட்டவரை மட்டம் தட்டி அனுப்ப முயலவில்லை. பதில் தெரியாத பொழுது பிறகு வாருங்கள் என்று அனுப்பி, வஹி வந்த பின்னர், அதற்கான பதிலை வழங்கி இருக்கின்றார்கள். இது தொடர்பான ஹதீஸ்களை உலமாக்களிடம் கேட்டு தெரிந்து கொள்ளலாம்.

ஆகவே, ஜப்னா முஸ்லிம் இல் கருத்து, பதில் எழுதுகின்ற சகோதரர்களை கண்ணியமாகவும், நாகரீகமாகவும் நடந்து கொள்ளுங்கள் என்று சகோதர உரிமையுடன் கேட்டுக் கொள்கின்றேன்.

கேள்வி கேட்கும் உரிமையை மறுக்காதீர்கள், அப்படி மறுப்பது இஸ்லாம் காட்டித் தந்த வழிமுறை அல்ல.

அல்லாஹ் நம் அனைவருக்கும் நேர்வழியை காட்டுவானாக.