றிசாத் பதியுதீனை தடுத்துநிறுத்த, இறுதிக்கட்ட முயற்சிகள்

வில்பத்து வனப்பகுதியில் பாரிய காடழிப்பு மேற்கொள்ளப்பட்டு முஸ்லிம்கள் சட்டவிரோதமாக குடியமர்த்தப்படுவதாக எழுந்த குற்றச்சாட்டுகளைத் தொடர்ந்து ஆனந்த தேரர் மற்றும் ரிஷாத் பதியுத்தீனுக்கும் இடையில் (28.12.2015) அன்று ஏற்பாடு செய்யப்பட்டிருந்த விவாதத்தை தடுத்துநிறுத்த இறுதி நேரம்வரை முயற்சிகள் மேற்கொண்ட தகவல் வெளியாகியுள்ளது.

இதுகுறித்து ஜப்னா முஸ்லிம் இணையத்திற்கு மிகவும் ஆதாரபூர்வமாக கிடைத்த தகவல்கள் வருமாறு.

உலமாக்கள், அரசியல்வாதிகள், வெளிநாடுகளில் உள்ள பிரமுகர்கள் என அமைச்சர் றிசாத்துடன் தொலைபேசி மூலமும், நேரடியாகவும் பேசியுள்ளனர்.

அதாவது உங்களுக்கு சிங்களம் ஒழுங்காக தெரியாது, நீங்கள் சட்டத்தரணி அல்ல, இளம் அரசியல்வாதி உங்களுக்கு பக்குவம் போதாது எனவே தயவுசெய்து சாகல தேரருடன் விவாதத்திற்கு செல்ல வேண்டாமென வலியுறுத்தியுள்ளனர்.

இன்னும் சிலரோ நீங்கள் சாகல தேரருடன் விவாதத்தில் தோற்றுவிடுவீர்கள், இதனால் இனக்கலவரம் வெடிக்கும் எனவே போகாதீர்கள் என எச்சரித்துள்ளனர்

மேலும் சிலர், பௌத்த தேரருடனான விவாதத்திற்குப் பின்னர் முஸ்லிம்களுக்கு ஏதாவது நடந்தால் அதற்கு நீங்கள்தான் பொறுப்பு. உங்களை நாங்கள் சபிப்போம் என மிரட்டியுள்ளனர்.

பௌத்த தேரருடனான இந்த விவாதத்திற்கு முன்னர் றிசாத்துடன் பேசிய 80 சதவீதமானவர்கள், றிசாத் குறித்த விவாதத்தில் பங்கேற்பதற்கு எதிர்ப்பு வெளியிட்டுள்ளது மாத்திரமின்றி, எப்படியேனும் அந்த விவாதத்தை நிறுத்திவிடவும் தமது அத்தனை முயற்சிகளையும் மேற்கொண்டுள்ளனர்.

எனினும் அமைச்சர் றிசாத், நான் அல்லாஹ்வை நம்பிச் செல்கிறேன், எனக்கும் எனது சமூகத்திற்கும் அல்லாஹ் பாதுகாப்பளிப்பான் என்று கூறி விவாதத்தில் பங்கேற்றதாக ஜப்னா முஸ்லிம் இணையத்திற்கு நம்பகரமான வட்டாரங்களிலிருந்து அறியக்கிடைத்தது.