புதிதாக அறிமுகமாகவுள்ள அடையாள அட்டையும், முஸ்லிம்கள் எதிநோக்கி இருக்கும் பிரச்சினையும்..!

-Ash Sheikh M Z M Shafeek-

அஸ்ஸலாமு அலைக்கும் வரஹ்மதுல்லாஹி வபரகாத்துஹு 

வரக்கூடிய 2016 ஜூன் மாதமளவில் இலங்கை அரசால்  புதிதாக அறிமுகப்படுத்தப்படவுள்ள இலத்திரனியல் (மின்னணு) தேசிய அடையாள அட்டையில் காணப்படும் புகைப்படத்தில் எந்தவொரு மதத்தையோ சமூகத்தின் கலாச்சாரத்தையோ பிரதிபலிக்கும் வகையிலான எந்தவொரு அடையாளமும் இருக்கமாட்டாது. சட்டத்தை மாற்ற எனக்கு அதிகாரமில்லை என ஆட்பதிவு தினைக்களத்தின் ஆணையாளர் அண்மையில் உறுதிப்பட தெரிவித்து செய்தி  வெளியிட்டிருந்ததை அனைவரும் அறிவோம்.

தேசிய அடையாள அட்டையில் முஸ்லிம்களின் அடையாளத்துக்கு அவ்வாறான தடை இருக்குமானால் முஸ்லிம்கள் அதனை ஏற்றுக் கொள்ளமாட்டார்கள் என்பது மிகத் தெளிவான விடையமாகும். முஸ்லிம் ஆண்கள் தொப்பி அணிந்து  அடையாள அட்டையை பெற்றுக் கொள்வது கூட  எமது உரிமை தான். இவ்வளவு காலமும் அவ்வாறே விரும்பியவர்கள் தொப்பி அணிந்தே அடையாள அட்டைகளை பெற்று வந்துள்ளனர். எமது மத, கலாச்சார ரீதியான உரிமைகளை வென்றெடுத்து முஸ்லிம்கள் இலங்கையில் தலை நிமிர்ந்து வாழ்வதற்கான சகல வழிகளையும் பெரும் போராட்டம் நடாத்தி எமது முன்னைய அரசியல், மத, சமூக தலைவர்கள் ஏற்படுத்தி விட்டு சென்றிருக்கின்றார்கள். மத நல்லிணக்கத்துக்காக விட்டுக் கொடுக்க வேண்டிய, நெகிழ்வுத் தன்மையை கடை பிடிக்க வேண்டிய பல அம்சங்கள் இருக்கின்றன. அவற்றில் நாம் கண்டிப்பாக தாராளத் தன்மையுடன் நடந்து கொள்ள வேண்டும்.   இருப்பினும் இது போன்ற எமது உரிமையோடு சம்பந்தப் பட்ட விடையங்களை நாம் விட்டுக் கொடுப்போமாயின் பின்பு கடவுச் சீட்டு, சாரதி அனுமதிப் பத்திரம், அரச திணைக்களங்களில் சேவை செய்பவர்களுக்கான அட்டைகள், பாராளுமன்றினால்  அனுமதி வழங்கப் படக் கூடிய விசேட  அடையாள அட்டைகள் என இதன் பட்டியல் நீண்டு கொண்டே செல்லலாம். மாத்திரம் இன்றி எமது பல உரிமைகளிலும் கை வைக்கப் படலாம் என்பதை நாம் சிந்திக்கக் கடமை பட்டுள்ளோம்.

அத்தோடு  முஸ்லிம் பெண்களை பொறுத்த வரை அதை ஒரு போதும் முஸ்லிம்களாகிய நாம் விட்டுக் கொடுக்க முடியாது. விட்டுக் கொடுக்கவும் கூடாது.  அவ்வாறு விட்டுக் கொடுப்போமெனில் அது நடை முறையில் வரும் போது எமது பெண்கள் ஏராளமான பிரச்சினைகளுக்கு முகம் கொடுக்க நேரிடலாம். குறிப்பாக அடையாளத்தை உறுதிப் படுத்த வேண்டிய தேவை ஏற்படும் பல சந்தர்ப்பங்களில் எமது முஸ்லிம் பெண்கள் முகத்தை மட்டும் காண்பிக்க முற்பட்டால் போட்டோவில் இருப்பதை சரியாக அடையாள படுத்திக் கொள்ள அவர்கள் அணிதிருக்கும் புர்காவை ( முகமூடி) ஹிஜாபை, முந்தானையை, தலை சீலையை அகற்றி விட்டு தலையை முழுமையாக காண்பிக்குமாறு நிர்பந்திக்கப் படலாம். 

நிச்சியமாக எமது சமூகம் இவ் விடையத்தில் காலம் தாழ்த்தி கண் விழிக்கும் என்பதில் சந்தேகம் கிடையாது. (அதாவது குறித்த சட்டம் எப்போது  - 2016 ஜூன் மாதமளவில் -  அமுலுக்கு வருகின்றதோ அப்போது குரல் கொடுக்க ஆரம்பிக்கும். எனினும் அப்போது அது போன பஸ்சுக்கு கை காட்டிய கதையாகவே இருக்கப் போகின்றது என்பது திண்ணம். உண்மையில் இது  தவிர்த்துக் கொள்ள முடியுமான, அல்லது மாற்று வழிகள் உள்ள ஒரு விவகாரமாக இருந்தால் கூட சற்று நெகிழ்வுப் போக்குடன் நடந்து கொள்ள முடியும். எனினும்  நாட்டில் எமது அடையாளத்தை உறுதிப் படுத்திக் கொள்ளவும், அரச, பொது திணைக்களங்களில் எமக்குரிய தேவைகளை நிறைவேற்றிக் கொள்ளவும், பாதுகாப்பு தரப்பினரின் கெடுபிடிகளில் இருந்து எம்மை விடுவித்துக் கொள்ளவும் கண்டிப்பாக எமது கையோடு இருக்க வேண்டிய ஒரு ஆவணம் என்பதால் நாம் அனைவரும் இதில் கண்டிப்பாக  கவனம் செலுத்தியாகவேண்டும்.   

இந்தப் பிரச்சினை முஸ்லிம்களுக்கு மட்டுமல்ல ஏனைய மதத்தவர்களுடனும் சம்பந்தப்  பட்டிருக்கின்றது. குறிப்பாக கத்தோலிக்க அருட்சகோதரிகளுக்கு கூட இதனால் பல அசெளகரியங்கள்  ஏற்படலாம் என்பதால் இதற்கு சகல தரப்பினரும் இணைந்து தீர்வுகாண வேண்டியதன் அவசியம் ஏற்பட்டுள்ளது. ஏனைய மதத்தவர்கள் மிகச்சிறிய அளவில் பாதிக்கப் பட வாய்ப்பு இருக்கின்ற போதிலும் கடந்த அரசில் முஸ்லிம்களுக்கு எதிராக மேற்கொள்ளப் பட்ட இனவாத செயற்பாடுகளின் பின்னணியிலே உருவான ஒரு சட்டமாகக் கூட இது இருக்குமோ என்ற சந்தேகத்தையும் எம்மில்  ஏற்படுத்துகின்றது. 

ஆகவே முஸ்லிம் அமைச்சர்கள், ஜம்இய்யத்துல் உலமா, முஸ்லிம் கலாச்சார அமைச்சு, கத்தோலிக்க திருச் சபைகள், சமூகத் தலைமைகள் என அனைத்துத் தரப்பினரும் இனைந்து ஜனாதிபதியுடனும் அரச  பாதுகாப்பு, கலாச்சார அமைச்சுக்களுடனும் கலந்துரையாடி  இதற்கு ஒரு சுமூகமான தீர்வை பெற்றுத் தர வேண்டும்  என்பதே அனைவரினதும் எதிர்பார்ப்பாகும். 

தயவு செய்து இக் கட்டுரையை வாசிப்பவர்கள் எவரேனும் மேற் குறிப்பிட்ட தரப்புகளுடன் நெருங்கிய தொடர்பு வைத்திருப்பின் இதனை ஒரு சமூக சேவையாகவும், இபாதத்தாகவும் மனதிற் கொண்டு கண்டிப்பாக  அவர்களது கவனத்திற்கு கொண்டு செல்ல முயற்சிக்குமாறு பணிவன்புடன் வேண்டிக் கொள்கின்றோம்.