மக்களின் வரிப்பணத்தில் படித்து, வைத்தியரானவர்கள் போராட்டம் - மக்களோ பெரும் அவதி

வேலை நிறுத்தப் போராட்டம் வெற்றிகரமாக முன்னெடுக்கப்பட்டு வருவதாக அரச வைத்திய அதிகாரிகள் சங்கச் செயலாளர் வைத்தியர் நலின் ஹேரத் தெரிவித்துள்ளார்.

மேலும் 10 வருடங்களுக்கு ஒருமுறை வாகன அனுமதிப் பத்திரத்தைப் பெறமுடியும் என்ற அரசாங்கத்தின் தீர்மானத்தை ஏற்கவில்லை என, அவர் சுட்டிக்காட்டியுள்ளார்.

இதேவளை, நாடுபூராகவும் வைத்தியர்கள் வேலைநிறுத்தத்தை மேற்கொண்டுள்ளதால், சிகிச்சைக்காக வரும் நோயாளர்கள் பெரும் அசௌகரியங்களை எதிர்நோக்கியுள்ளதாக எமது செய்தியாளர்கள் குறிப்பிட்டுள்ளனர்.

கொழும்பு தேசிய வைத்தியசாலை நடவடிக்கைகள் இதனால் பெரிதும் பாதிக்கப்பட்டுள்ளதாக, வைத்தியசாலை பணிப்பாளர் அனில் ஜெயசிங்க தெரிவித்துள்ளார்.

மேலும் தாம் பெரும் சிரமங்களை எதிர்நோக்கியுள்ளதாக இங்கு சிகிச்சை பெற வந்த நோயாளிகளும் கூறியுள்ளனர்.

மட்டக்களப்பு மாவட்டத்திலும் வைத்திய அதிகாரிகள் இன்று வேலை நிறுத்த போராட்டத்தில் ஈடுபட்டுள்ளதால் வைத்தியசேவைகள் பெரிதும் பாதிக்கப்பட்டுள்ளதாக எமது செய்தியாளர் தெரிவிக்கின்றார்.

மட்டக்களப்பு போதனா வைத்தியசாலையில் வெளிநோயாளர் பிரிவு வெறிச்சோடிக் காணப்பட்டதாகவும் தூர இடங்களிலிருந்து வந்த நோயாளர்கள் திரும்பிச் சென்றதை அவதானிக்க முடிந்ததாகவும் எமது செய்திளார் குறிப்பிட்டார்.

இதேவேளை நுவரெலியா மாவட்டத்தில் உள்ள வைத்தியசாலைகளின் வைத்தியர்களும் பணிபகிஸ்கரிப்பில் ஈடுபட்டுள்ளனர்.

டிக்கோயா கிளங்கன் வைத்தியசாலையில் வெளிநோயாளர் பிரிவு முற்றாக இயங்கவில்லை என்றும் இங்கு சிகிச்சைக்காக வருகை தந்த பொதுமக்கள் பல சிரமங்களுக்கு மத்தியில் வீடு திரும்ப வேண்டிய சூழ்நிலை ஏற்பட்டதென்றும் அங்கிருக்கும் எமது செய்தியார் குறிப்பிட்டார்.