"சவூதி அரேபியா ஹஜ் புனிதப் பயணத்தை தொடர்ந்து நடத்தும்"

ஹஜ் புனிதப் பயணத்தை சவூதி அரேபியா தொடர்ந்து நடத்தும் என்று அந்நாட்டு இளவரசர் துர்க்கி அல்-ஃபைசல் திட்டவட்டமாகக் கூறினார்.

 மக்கா அருகே மதீனாவில், ஹஜ் புனித யாத்திரையின்போது கடந்த மாதம் ஏற்பட்ட நெரிசலில் சிக்கி 700-க்கும் மேற்பட்டோர் உயிரிழந்தனர்.

 ஹஜ் யாத்திரையை பாரம்பரியமாக சவூதி ஏற்பாடு செய்து வருகிறது. மேலும், மக்கா, மதீனாவில் உள்ள முக்கியத்துவம் வாய்ந்த இரு மசூதிகளின் பாதுகாவலர் என்று சவூதி மன்னர் அறியப்படுகிறார்.

 இந்த நிலையில், நெரிசலில் சிக்கி ஏராளமானோர் பலியானதையடுத்து, சவூதி அரசின் ஹஜ் ஏற்பாடுகள் சர்வதேச அளவில் கடும் விமர்சனத்துக்கு உள்ளாகின.

 சவூதி அரசு வெளியிட்ட பலி எண்ணிக்கையைவிட மிக அதிக அளவில் உயிரிழப்பு ஏற்பட்டுள்ளதாகப் பல நாடுகள் கூறின.

 பல்வேறு நாடுகளின் ஹஜ் குழு வெளியிட்ட விவரங்களின் அடிப்படையில், ஹஜ் நெரிசலில் சிக்கி உயிரிழந்தோர் எண்ணிக்கை 1,400-க்கும் அதிகம் என்று அசோசியேட்டட் பிரஸ் செய்தி நிறுவனம் தெரிவித்தது.

 இதற்கு முன்னரும் ஹஜ் யாத்திரையின்போது நெரிசல் மரணங்கள் ஏற்பட்டுள்ளன.

 இந்த நிலையில், புனித யாத்திரை ஏற்பாடுகளை முஸ்லிம் நாடுகள் இணைந்து நடத்த வேண்டும் என்ற கோரிக்கை எழுப்பப்பட்டது.

 கடந்த மாத நெரிசலில் அதிக அளவில் உயிரிழந்தவர்கள் ஈரானைச் சேர்ந்தவர்கள். சவூதியின் ஏற்பாடுகளைக் கடுமையாகச் சாடிய ஈரான் அரசு, ஹஜ் பயணத்தை தன்னிச்சையான சர்வேதச அமைப்பு நடத்த வேண்டும் என்று கூறி வருகிறது.

 இந்த நிலையில், சவூதி இளவரசர் துர்க்கி அல்-ஃபைஸல் அந்தக் கோரிக்கையை முற்றிலும் நிராகரித்தார்.

 அபுதாபியில் அவர் திங்கள்கிழமை கூறியதாவது:

 மக்காவில் உள்ளவர்கள்தான் மக்காவைப் பற்றி நன்கு அறிந்தவர்கள். அவர்களது உரிமையை மறுக்க முடியாது.

 ஹஜ் யாத்திரையை சவூதியே தொடர்ந்து நடத்தும். இது எங்கள் நாட்டின் உரிமை மட்டுமல்ல; யாத்திரை ஏற்பாடுகளைச் செய்வது சவூதி அரேபியாவின் இறையாண்மை சார்ந்த விவகாரமாகும்.

 மக்கா, மதீனாவின் முக்கியத்துவம் வாய்ந்த இரு மசூதிகளின் பாதுகாவலர் என்று சவூதி மன்னர் அறியப்படுகிறார். அந்தத் தனித்துவத்தையும் உரிமையையும் விட்டுக் கொடுக்க முடியாது என்று சவூதி இளவரசர் துர்க்கி அல்-ஃபைஸல் கூறினார்.