ஓ.. சீர்திருத்தவாதியே...!

இந்தக் கவிதை மூலமாக சில உள்ளங்கள் சிறிது சிந்திக்க ஆரம்பிக்குமெனில் அதுவே, இப்படைப்பின் வெற்றி..!

-Dr. Mohamed Hasan Basree-

கூட்டு துஆ பிழையென்றீர்
  குனூத் ஓதல் தவறென்றீர்-விரல்
ஆட்டுவித்து ஓதினால்தான்
  அத்தஹியாத்தும் சரியென்றீர்.
ஏட்டிலுள்ள சட்டங்கள்
  எல்லாமே பிழையென்றீர்.
காட்டு காட்டு ஆதாரமென்று
  காண்பதெல்லாம் குறைகண்டீர்.

பெருநாள் தொழுகையது
  பெருவெளியில் திடலிலென்றீர்
திருநாள் அதனிலும் பல
  திருத்தங்கள் கண்டுபிடித்தீர்
பர்ளான கடமைகளையே நாம்
  பாதியளவும் செய்யாதபோது
அருளெங்கு கிடைக்கும்? அவை
  அர்த்தமற்றல்லவா கிடக்கும்!

குதிகாலைத் தேய்த்துக்கழுவ
  கிழவருக்கும் தெரியலையே!
அதிகாலைத் தொழுகைக்கு
  அரைவரிசையே நிரம்பலையே! - யூத
சதிகாரன் சதியென்று
  சொல்வது நம் பிழையே!
மதிகெட்டு மறைமறந்து
   மாள்வது நம் குறையே!

பாங்கினோசை கேட்டாலும்
  பாதிசனம் கேட்பதில்லை.
ஏங்கி நிற்கும் பள்ளிவாசல்கள்
  எதுவும் இங்கு நிறைவதில்லை.
தூங்கியே சனம் வழிகிறதே
  தூய்மையான சுபஹ் பொழுதில்,
தாங்கிடுமா நரக வேதனைகளை?
  தாண்டிடுமா கப்ர் சோதனைகளை?

ஏழைவரி ஸகாத் அதனை
  எவரிங்கு கொடுக்கிறோம்?
கோழைபோல் ஒளித்துக்கொண்டு
  கொடுப்பதற்கே மறுக்கிறோம்!
நாளை மறுமையில் தப்பித்து
  நாமெங்கே போவது? நூறு
சூளைபோல் சுடும் நரகின்
  சூட்டிலே என்ன ஆவது?

ஆதன உரிமைச்சட்டம்
  அரைவாசியாவது தெரிந்தால்தானே
சீதனத்தை ஒழிக்கலாம்
   சீர்திருத்தலாம் சமூகத்தை
சோதனைகளுக்கு சமயப்பாடம்
  சொற்பமாகப் படிக்கிறோமே! நரக
வேதனைக்குப் பயந்து
  வாழ்வதனில் கொள்கிறோமா?