பௌத்த மதத்தைப் பாதுகாக்குமாறு கோரி, அரசியல்வாதியின் கட்அவுட் மீதேறி தற்கொலை முயற்சி

பௌத்த மதத்தைப் பாதுகாக்குமாறு கோரி, மகரகம நகரின் மத்தியில் அமைந்துள்ள அரசியல்வாதியொருவரின் கட்அவுட் மீதேறி நபரொருவர் தற்கொலை செய்து கொள்ள முயற்சித்துள்ளார்.

இந்தச் சம்பவம் நேற்று மாலை நடைபெற்றுள்ளது.

குறித்த நபர் தனது வயிற்றில் இரண்டு பெற்றோல் குண்டுகளைக் கட்டிக் கொண்டு, கையில் லைட்டர் ஒன்றையும் வைத்துக்கொண்டு அரசியல்வாதியொருவரின் கட்அவுட் மீதேறி தற்கொலை மிரட்டல் விடுத்துள்ளார்.

அத்துடன் பௌத்த மதத்தைப் பாதுகாக்குமாறு அரசாங்கத்துக்கு கோரிக்கை விடுக்கும் கடிதங்களையும் காட்சிப்படுத்தியுள்ளார். குறித்த கட்அவுட் 20 அடி உயரமானது என்று தெரிவிக்கப்படுகின்றது.

பொதுமக்களும் பொலிசாரும் இணைந்து அவரை கட்அவுட்டை விட்டுக் கீழே இறக்க மேற்கொண்ட முயற்சி பலனளிக்கவில்லை.

இதனையடுத்து அருகில் இருந்த விகாரையில் இருந்து அவ்விடத்துக்கு வருகை தந்த பிக்குமார் இருவரின் வேண்டுகோளை அடுத்து குறித்த நபர் கீழே இறங்கி பொலிசாரிடம் சரணடைந்துள்ளார்.

கைது செய்யப்பட்ட நபர் அநுராதபுரம், ரம்பாவ பிரதேசத்தைச் சேர்ந்தவர் என்பது விசாரணைகளில் தெரிய வந்துள்ளது.