நான் மேற்கொண்ட முயற்சிகளை கண்டுகொள்ளவில்லை - சுசில் பிரேமஜயந்த
எதிர்க்கட்சித் தலைவரை நியமிப்பது தொடர் பில் சரியான நேரத்தில் சரியான முறையில் தீர்மானங்களை எடுத்திருந்தால் தற்போதைய நிலைமையை விட சிறப்பான நிலைமையை ஏற்படுத்திக் கொண்டிருக்கலாம் எனத்தெரிவித்துள்ள அமைச்சர் சுசில் பிரேமஜயந்த தேசிய அரசாங்கம் என்பதை விட இணக்கப்பாட்டு அரசு என்பதே பொருத்தமானதாகும் என்றும் அமைச்சர் தெரிவித்துள்ளார்.
தொழில்நுட்பக் கல்வி மற்றும் தொழில் அமைச்சராக பதவியேற்றுள்ள அமைச்சர் சுசில் பிரேமஜயந்த வியாழக்கிழமை அமைச்சில் கடமைகளை பொறுப்பேற்று பின்னர் ஊடகங்களுக்கு கருத்து தெரிவித்த போதே இவ்வாறு தெரிவித்துள்ளார். அமைச்சர் இங்கு மேலும் தெரிவித்திருப்பதாவது,
இரண்டு கட்சிகளுக்கும் மக்கள் பெரும்பான்மையை வழங்கவில்லை. தேசிய அரசொன்று அமைக்கப்பட வேண்டுமென்பதற்காகவே மக்கள் இவ்வாறான தீர்ப்பை தேர்தலில் வழங்கினார்கள். எனவே கொள்கையொன்றின் வரையறைக்குள் ஆட்சியொன்றை ஏற்படுத்தியிருந்தால் சிறப்பாக அமைந்திருக்கும்.
தற்போதைய ஆட்சிக்கு தேசிய அரசு எனக் கூறுவதை விட இணக்கப்பாட்டு ஆட்சி எனக் கூறுவதே பொருத்தமானதாக அமையும். எதிர்க்கட்சித் தலைவரை நியமிக்கும் விடயத்தில் சரியான நேரத்தில் சரியன முறையில் சரியான முடிவு எடுக்கப்பட்டிருந்தால் இதனை விட சிறப்பான நிலைமை ஏற்பட்டிருக்கும்.
2004 மற்றும் 2010 ஆம் ஆண்டு தேர்தல்களின் போது தேசியப் பட்டியல் தொடர்பாக எவ்விதமான குறைபாடுகளும் இருக்கவில்லை. குற்றச்சாட்டுகளும் இருக்கவில்லை. ஆனால் இம்முறை தேசியப் பட்டியல் தொடர்பில் எனது பங்களிப்பு கிடையாது. எனவே என்மீது எந்தக் குற்றச்சாட்டையும் முன்வைக்க முடியாது. ஐக்கிய மக்கள் சுதந்திர முன்னணியின் செயலாளர் என்ற ரீதியில் நான் ஒரு தீர்மானத்தை எடுத்தேன். தேர்தலின் பின்னர் கட்சியுடன் பேச்சுவார்த்தைகளை நடத்தி எதிர்க்கட்சி தலைவராக நிமால் சிறிபால சில்வாவை நியமித்து அது தொடர்பில் சபாநாயகருக்கு கடிதமொன்றை கையளித்தோம்.
அப்போது நாம் அரசின் பங்காளிகளாக இருக்கவில்லை. பின்னர் நான் ஐ.ம.சு.முன்னணியின் செயலாளர் பதவியிலிருந்து வெளியேறினேன். வெளிநாடு சென்றேன். பின்னர் திரும்பி வந்த போது அனைத்தும் மாற்றமடைந்திருந்தது.
எனக்கெதிராக தடையுத்தரவு அமுலில் இருக்கையில் சிலர் ஊடகவியலாளர்கள் மாநாடுகளை நடத்தினார்கள். தேங்காய் உடைத்தார்கள். நான் மேற்கொண்ட முயற்சிகளை கண்டுகொள்ளவில்லை. புரிந்து கொள்ளவும் இல்லை என்றார்.
Post a Comment