இலங்கையில் தயார்படுத்தப்படும் தூக்குமேடை - மரண தண்டனை கைதிகள் அச்சம்

வெலிக்கடைச் சிறைச்சாலையில் உள்ள மரண தண்டனைக் கைதிகள் தூக்குத்தண்டனை குறித்த அச்சம் காரணமாக கடும் கலக்கத்திற்குள்ளாகியிருப்பதாக தெரியவந்துள்ளது.

அண்மைக்காலமாக நாட்டில் பெருகி வரும் குற்றச்செயல்களின் காரணமாக பாரிய குற்றங்களுக்குத் தூக்குத் தண்டனை விதிக்க வேண்டும் என்ற குரல்கள் நாட்டில் வலுப்பெறத் தொடங்கியுள்ளன.

ஏற்கெனவே மரண தண்டனை அளிக்கப்பட்டு சிறைச்சாலைகளில் தடுத்து வைக்கப்பட்டுள்ள சிறைக் கைதிகள் இதன் காரணமாக கடும் கலக்கம் அடைந்துள்ளனர்.

வெலிக்கடைச் சிறைச்சாலையில் தடுத்து  வைக்கப்பட்டுள்ள மரண தண்டனைக் கைதிகள் இதன் காரணமாக திடீர் சுகயீனம், வயிற்றுப்போக்கு, மயக்கம் என்பவற்றால் பாதிக்கப்பட்டு மருத்துவமனையில் அனுமதிக்கப்பட்டு வருவதாக சிறைச்சாலை வட்டாரங்கள் தெரிவிக்கின்றன.

வெலிக்கடை சிறைச்சாலையில் இருக்கும் தூக்குமேடை கடந்த சில நாட்களாக தயார்படுத்தப்பட்டு வருவதும் மரண தண்டனைக் கைதிகள் மத்தியில் ஏற்பட்டுள்ள திடீர் கலக்கத்திற்கான காரணமாக அமைந்திருப்பதாகவும் தெரியவந்துள்ளது.