முஸ்லிம் காங்கிரஸினை சிதைந்துவிடாமல் கட்டிக்காத்த நான், வேட்பாளர் தெரிவு தொடர்பில் உண்மையை அம்பலப்படுத்துவேன் - பஷீர் சேகுதாவூத்

-athavan-

எதிர்வரும் பொதுத் தேர்தலில் போட்டியிடும் வேட்பாளர்களைத் தெரிவு செய்வதில் ஸ்ரீலங்கா முஸ்லிம் காங்கிரஸுக்குள் என்ன? நடந்தது என்ற உண்மையை உலகுக்கு அம்பலப்படுத்தப் போவதாக ஸ்ரீ லங்கா முஸ்லிம் காங்கிரஸ் தவிசாளரும், முன்னாள் அமைச்சருமான பஷீர் சேகுதாவூத் தெரிவித்தார்.

மட்டக்களப்பு மாவட்டத்தில் ஸ்ரீ லங்கா முஸ்லிம் காங்கிரஸ் சார்பாகப் போட்டியிடும் வேட்பாளர் தெரிவில் முறைகேடுகள் இடம்பெற்றதாகக் கூறப்படும் குற்றச்சாட்டுக்கள் குறித்து கேட்டபோது அவர் இவ்வாறு தெரிவித்தார். தொடர்ந்து அவர் கூறும்போது தெரிவித்தாவது,

‘ஸ்ரீ லங்கா முஸ்லிம் காங்கிரஸின் மூத்த உறுப்பினர்களுக்கு வாய்ப்பளிக்கப்படாமல் வேறு கட்சிகளில் இருந்து கடந்த காலங்களில் முஸ்லிம் காங்கிரஸின் கொள்கைகளுக்கு எதிராகச் செயற்பட்டு வந்த புதியவர்கள் பலர் இம்முறை மட்டக்களப்பு மாவட்டத்தில் ஸ்ரீ.ல.மு.காவின் வேட்பாளர்களாக உள்வாங்கப்பட்டிருக்கின்றார்கள். இது குறித்த அதிருப்தி பொதுமக்களிடம் பரவலாக இருக்கின்றது.

எனவே, தலைவர் அஷ்ரபின் மறைவின் பின்னர் கடந்த 15 வருடங்களுக்கு மேலாக இந்தக் கட்சியை சிதைந்து விடாமல் கட்டிக் காத்து வந்ததில் முக்கிய போராளி என்ற வகையிலும் ஸ்ரீ லங்கா முஸ்லிம் காங்கிரஸின் தவிசாளர் என்ற வகையிலும் இந்த விடயங்களைத் பொதுமேடை போட்டுத் தெளிவுபடுத்த வேண்டிய கடப்பாடு எனக்கிருக்கின்றது.

கட்சித் தாவல் இல்லாமல் இந்தக் கட்சியைக் காத்து வந்த மூத்த போராளி என்ற வகையில் தொடர்ந்தும் ஸ்ரீலங்கா முஸ்லிம் காங்கிரஸ் அரசியலில் இணைந்திருந்து போராடி வழிநடத்துவேன். எச்சந்தர்ப்பத்திலும் கட்சி அரசியலில் இருந்து நான் ஒதுங்கப் போவதில்லை’. என்றும் கூறினார்.