"மின்னல்" நிகழ்ச்சிக்கு தேர்தல் ஆணையாளரினால் தடை

-Anbu Javaharsha-

முன்னாள் பாராளுமன்ற உறுப்பினரும், பிரஜைகள் முன்னணியின் பொதுச் செயலாளருமான ஜே. ஸ்ரீ ரங்காவினால் சக்தி டி.வியில் நடத்தப்படும் மின்னல் அரசியல் நிகழ்ச்சிக்கு தேர்தல் ஆணையாளர் மஹிந்த தேசப்பிரியவினால் இன்று தடை விதிக்கப்பட்டது.

இந்தச் செய்தி தொடர்பாக மகிழ்ச்சியாக அல்ல தகவலுக்காக ஒரு விடயத்தை தெரிவிக்க வேண்டி உள்ளது. 2009 ஆம் ஆண்டு மின்னல் நிகழ்ச்சி ஒன்றில் ஜே. ஸ்ரீ ரங்காவால்  பிழையான தகவல் ஒன்று சொல்லப்பட்டது.அந்தச் சந்தர்ப்பத்தில் பலமுறை முயன்றும் தொலைபேசியில் தொடர்புகொள்ள முடியவில்லை.'முன்னாள் கல்வி அமைச்சர் காயிதேமில்லத் கலாநிதி அல்ஹாஜ் பதியுத்தீன் மஹ்மூத் M .A .,D .Litt அவர்கள்(பிறப்பு 1904.06.23) எட்டாம் வகுப்பு சித்தி பெற்ற முஸ்லிம்களுக்கு ஆசிரியர் நியமனம் வழங்கினார் ;என்ற அப்பட்டமான பொய்யை இவர் மின்னல் நிகழ்ச்சியில் சொன்னார். அடுத்த வாரம் வெளியான 'விடிவெள்ளி' வார இதழில் இந்தக் கூற்றைக் கண்டித்து எழுதி இருந்தேன்.1960,1970,1977 ஆகிய ஆண்டுகளில் அவர் வழங்கிய எந்த நியமனமும் அடிப்படைத் தகைமை இல்லாது வழங்கப்படவில்லை.

2013 ஆம் ஆண்டு நடந்த ஒரு நிகழ்ச்சியிலும் இதே கருத்தை மீண்டும் சொன்னார்.இந்த சமயத்திலும் பலமுறை முயன்றும் தொலைபேசியில் தொடர்புகொள்ள முடியவில்லை.உங்களுக்கும் ,உங்கள் மின்னலில் கலந்து கொள்ளும் சில முஸ்லிம் அரசியல்வாதிகளுக்கும் இது தெரியாமல் இருக்கலாம் ஆனால் புத்திஜீவிகளாகிய நாம் இதை ஏற்றுக்கொள்ளவும் முடியாது இப்படியான அபாண்டங்கள் மீண்டும்,மீண்டும் சொல்லப்பட்டு உண்மையாக்கப்படுவதை சகித்துக்கொள்ளவும் முடியாது.

தவறுதலாக மின்னல் தொடர்பாக மின்னிய உண்மை இப்படி பல விடயங்களை வெளிக்காட்டும்..எங்களுக்கு உங்கள் அரசியல் பற்றி பிரச்சினை இல்லை.அது உங்களது சுதந்திரம்.ஆனால் சக்தியில் உங்களுக்கு உள்ள தனிப்பட்ட செல்வாக்கால் சகலரையும் முட்டாள்கள் ஆக்க முயல்வதும் மலையக ,முஸ்லிம் சமூகங்கள் பகடைகள் ஆக்கப்படுவதும் தான் கவலையாக உள்ளது.