யேமனின் போரை நிறுத்த, உடனடி நடவடிக்கை வேண்டும் - ஈரான்

ஏமனில் நடைபெற்று வரும் உள்நாட்டு போரை நிறுத்த உடனடியாக நடவடிக்கை எடுக்க வேண்டும் என ஐநாவிடம், ஈரான் வலியுறுத்தி உள்ளது.ஏமன் நாட்டில் உள்நாட்டு போர் தீவிரமடைந்து வருகிறது. அரசுக்கும், ஹவுதி கிளர்ச்சி படையினர் இடையே நடந்துவரும் மோதலில் பொதுமக்கள் பெரிதும் பாதிக்கப்பட்டு வருகின்றனர். ஏமன் அரசுக்கு ஆதரவாக சவுதி கூட்டுப்படையினர் போரிட்டு வருகின்றனர். கடந்த 3 வாரங்களாக இரு தரப்பினர் இடையே கடும் சண்டை நடந்து வருகிறது.கிளர்ச்சியாளர்களின் கட்டுப்பாட்டில் உள்ள பகுதிகளை மீட்க சவுதி கூட்டுப்படையினர் வான்வழி தாக்குதல் நடத்தி வருகின்றனர். இதில், 750க்கும் மேற்பட்டோர் பலியாகி உள்ளனர். 1.50 லட்சம் பேர் தங்களது இருப்பிடங்களை விட்டு வெளியேறி விட்டனர். ஏமனில் தங்கியிருந்து பணிபுரியும் வெளிநாடுகளை சேர்ந்தவர்களை அந்தந்த நாடுகள் மீட்கும் பணியில் ஈடுபட்டு வருகின்றன.

இந்நிலையில், தீவிரமடைந்து வரும் உள்நாட்டு போரை முடிவுக்கு கொண்டுவரும் நடவடிக்கைகளில் ஐநா சபை இறங்கியுள்ளது. போரினால் பொதுமக்கள் மிகவும் பாதிக்கப்பட்டு வருவதாகவும், அவர்கள் அகதிகளாகும் சூழல் ஏற்பட்டுள்ளதால் போரை உடனடியாக நிறுத்த வேண்டும் என ஏமன் அரசு மற்றும் கிளர்ச்சி படையினருக்கு ஐநா பொது செயலாளர் பான்கிமூன் வேண்டுகோள் விடுத்துள்ளார்.

இந்நிலையில், ஹவுதி கிளர்ச்சி படைக்கு ஆதரவாக செயல்பட்டு வரும் ஈரான், இந்த போரை உடனடியாக நிறுத்த ஐநா சபை நடவடிக்கை எடுக்க வேண்டும் என வேண்டுகோள் விடுத்துள்ளது. இதுதொடர்பாக, ஈரான் நாட்டு வெளியுறவுத்துறை செயலர் முகமது ஜாவெத் ஐநா சபைக்கு கடிதம் எழுதியுள்ளார். அதில், “ ஏமனில் நடைபெற்று வரும் போரை நிறுத்த உலக நாடுகள் முன்வர வேண்டும். போரினால் பாதிக்கப்பட்டவர்களுக்கு மருத்துவ உதவிகள் கிடைக்கவும், மீண்டும் அமைதி திரும்பவும் ஐநா நடவடிக்கை எடுக்க வேண்டும். இதற்கான பேச்சுவார்த்தையை உடனடியாக தொடங்க வேண்டும்” என கூறியுள்ளார்.