மனிதக் கால்கள் மர்மம் தொடருகிறது - மோப்ப நாய் உதவியுடன் கைதான பெண் தகவல்கூற மறுப்பு

-Vi-

தெமட்டகொடை - சிறிதம்ம மாவத்தையில் உள்ள வடிகான் ஒன்றிலிருந்து மீட்கப்பட்ட மனிதக் கால்கள் தொடர்பிலான விசாரணைகள் பொலிஸாரினால் விரிவு படுத்தப்பட்டுள்ளன.

அந்த கால்கள் காணப்பட்ட இடத்தில் இருந்த தடயங்களை வைத்து பொலிஸ் மோப்ப நாயின் உதவியுடன் பெண்ணொருவர் கைது செய்யப்பட்ட நிலையில் சம்பவம் தொடர்பில் தகவல்களை மறைக்கும் குற்றச்சாட்டுக்காக அவரை நேற்று நீதிமன்றில் ஆஜர்படுத்தி எதிர்வரும் 18 ஆம் திகதி வரை விளக்கமறியலில் வைத்துள்ளதாக பொலிஸ் ஊடகப் பேச்சாளர் அலுவலகம் குறிப்பிட்டது.

கடந்த சனிக்கிழமை தெமட்டகொடை - சிறிதம்ம மாவத்தையில் உள்ள வடிகான் ஒன்றிலிருந்து இரு கால்கள் பொலிஸாரினால் மீட்கப்பட்டன. 119 அவசர தொலைபேசி அழைப்பூடாக தெமட்டகொடை பொலிஸாருக்கு கிடைத்த தகவல்களின் அடிப்படையிலேயே இவ்விரண்டு கால்களும் மீட்கப்பட்டன. மீட்கப்பட்ட இவ்விரு கால்களும் ஆணொருவருடையது என சந்தேகிக்கப்படும் நிலையில் முழங்காலுக்கு கீழ் அவ்விரு கால்களும் வெட்டப்பட்டிருந்தன.

இந்நிலையில் புதுக்கடை நீதி வான் நீதிமன்ற நீதிபதி ஸ்தலத்தை வந்து பார்வையிட்டதை தொடர்ந்து அவ்விரு கால்களும் கொழும்பு தேசிய வைத்தியசாலையின் பிரேத அறையில் வைக்கப்பட்டுள்ளன. வேறு ஒரு பிரதேசத்தில் வெட்டப்பட்ட நிலையில் அவ்விரு கால் களும் அந்த வடிகானில் போடப்பட்டிருக்கலாம் என சந்தேகிக்கும் பொலிஸார் அங்கிருந்து தடயங்கள் சிலவற்றைக் கைப்பற்றியுள்ளனர்.

அந்த வடிகானின் அருகில் இருந்து திறப்புக் கோர்வை ஒன்று தெமட்டகொடை பொலிஸாரினால் மீட்கப்பட்ட நிலையில் அதனை மோப்ப நாயிற்கு முகரச் செய்து சந்தேக நபர்களை தேடி விசாரணைகள் ஆரம்பிக்கப்பட்டன.

இந்நிலையில் குறித்த திறப்புக் கோர்வையை மோப்பம் பிடித்த பொலிஸ் மோப்ப நாய் அங்கிருந்து 50 மீற்றர் தூரத்தில் இருந்த பெட்டிக்கடை ஒன்றினுள் சென்றது. இதனையடுத்து அந்த பெட்டிக்கடையை நடத்தி வந்த பெண்ணை விசாரணை செய்த பொலிஸார் அவரை கைது செய்து மன்றில் ஆஜர்படுத்தி விளக்கமறியலில் வைத்தனர்.

குறித்த கடைக்கு காலை வேளை யில் தேநீர் அருந்த வந்த பாதுகாப்பு உத்தியோகத்தர் ஒருவரிடம் இரவு வேளையில் அந்த வடிகான் பிரதேசத்தில் சத்தம் ஒன்று கேட்டதாகவும் அங்கு சந்தேகத்துக்கு இடமான ஏதேனும் இருக்கலாம் எனவும் குறித்த பெண்ணே முதலில் கூறியிருப்பது பொலிஸாரின் புலன் விசாரணைகளில் வெளிப்படுத்தப்பட்டுள்ள நிலையில் அது தொடர்பில் அப் பெண் ஏதோ ஒரு ரகசியத்தை மறைக்கிறார் என்பதாலேயே அவரை கைது செய்து மன்றில் ஆஜர்படுத்தியதாகவும் பொலிஸார் குறிப்பிட்டனர்.

இந்நிலையில் அப்பெண் குறித்த சம்பவத்துடன் நேரடியாக தொடர்புபட்டுள்ளாரா இல்லையா என்பதைவிட அச்சம்பவம் குறித்து அவர் ரகசியம் ஒன்றினை அறிந்திருப்பதாகவும் அதனை மறைத்து வருவதாலேயே கைது செய்ததாகவும் பொலி ஸார் மேலும் குறிப்பிட்டனர்.