கல்முனையில் வாகன விபத்து, பிரதம கணக்காளர் உட்பட 6 பேர் காயம்

(அஸ்லம் எஸ்.மௌலானா)

கல்முனை மாநகர சபையின் பிக்கப் வாகனம் ஒன்று விபத்துக்குள்ளாகியதில் சபையின் பிரதம கணக்காளர் எச்.எம்.எம்.றசீட் உட்பட ஆறு பேர் காயமடைந்துள்ளனர்.

நேற்று வியாழக்கிழமை கல்முனையில் இருந்து திருகோணமலை நோக்கி பயணித்துக் கொண்டிருந்த வாகனம் கந்தளாய் பிரதான வீதி வளைவொன்றில் சாரதியின் கட்டுப்பாட்டை மீறி குடைசாய்ந்து தடம் புரண்டுள்ளதாக தெரிவிக்கப்படுகிறது.

இதனால் கணக்காளரும் சாரதியும் மேலும் நால்வரும் காயமடைந்து கந்தளாய் வைத்தியசாலையில் சிகிச்சைக்காக சேர்க்கப்பட்டனர்.

அதேவேளை முன் ஆசனத்தில் அமர்ந்திருந்த கணக்காளரின் தலை, கால் போன்ற அங்கங்கள் படுகாயமடைந்துள்ளதால் அவர் ஆபத்தான நிலையில் மேலதிக சிகிச்சைக்காக கண்டி வைத்தியசாலையின் தீவிர சிகிச்சைப் பிரிவுக்கு மாற்றப்பட்டு- பின்னர் பேராதெனிய வைத்தியசாலைக்கு விசேட சிகிச்சைக்காக சேர்க்கப்பட்டுள்ளார் அறிவிக்கப்படுகிறது.