'அரசாங்கம், இனவாதத்தினை ஆயுதமாக பயன்படுத்துகிறது' JVP
.jpg)
இனவாதத்தினை தூண்டி அதன் மூலம் ஆட்சியை தக்க வைத்துக்கொள்ளவே அரசாங்கம் முயற்சிக்கின்றது. ஊவா மாகாண சபைத் தேர்தலிலும் இது விதிவிலக்கல்ல என தெரிவிக்கும் ஜே.வி.பி. இம்முறை ஊவா மாகாண சபைத் தேர்தலிலும் மக்கள் அரசாங்கத்திற்கு தக்க பாடத்தினை கற்பிப்பார்கள் எனவும் குறிப்பிட்டது.ஜே.வி.பி. யினால் நேற்று ஏற்பாடு செய்யப்பட்டிருந்த செய்தியாளர் சந்திப்பின் போதே அக்கட்சியின் ஊடகப் பேச்சாளர் விஜித ஹேரத் மேற்கண்டவாறு தெரிவித்தார்.
இது தொடர்பில் அவர் மேலும் குறிப்பிடுகையில்;
ஏனைய மாகாண சபைத்தேர்தலை விடவும் ஊவா மாகாண சபைத்தேர்தல் அரசாங்கத்திற்கு மிக முக்கியமானது. தமது ஆட்சி தொடர்பில் அடுத்த கட்ட நடவடிக்கை எடுப்பதற்கு அரசாங்கம் இத்தேர்தலினை சரியாக பயன்படுத்திக் கொள்ள வேண்டும். கடந்த முறை ஊவா மாகாண சபைத்தேர்தல் 2009 ஆம் ஆண்டு ஓகஸ்ட் மாதம் இடம்பெற்றது. அதன்பின்னர் அரசாங்கம் உடனடியாக ஜனாதிபதித் தேர்தலை நடத்தியது. இம்முறையும் அவ்வாறான நிலைமையே ஏற்பட்டுள்ளது. 2016ஆம் ஆண்டில் பொதுத் தேர்தல் ஒன்றினை நடத்த வேண்டிய நிலையில் ஊவா மாகாண சபைத் தேர்தலின் முடிவில் அரசாங்கம் ஜனாதிபதித் தேர்தல் தொடர்பில் உறுதியான முடிவினை எடுக்கும்.
எனவே, அரசாங்கம் ஊவா மாகாண சபைத் தேர்தலை குறிவைத்து தமது தந்திரங்களை பிரயோகிக்கும். இன்று அரசாங்கம் தேர்தலில் வெற்றிபெறவோ தமது ஆட்சியினை தக்க வைத்துக்கொள்ளவோ இனவாதத்தினை ஆயுதமாக பயன்படுத்திக்கொண்டிருக்கின்றது. இது ஊவா மாகாண சபைத் தேர்தலிலும் விதிவிலக்கானதல்ல. எனினும் மக்கள் தெளிவான முடிவினை எடுப்பார்கள். இன்று நாம் பயணிக்கும் பாதை மிக மோசமானது. மக்களின் எதிர்காலம் கேள்விக்குறியாகியுள்ளது என்பதை மக்கள் நன்கு உணர்ந்து விட்டனர். எனவே அரசாங்கத்தின் அடாவடித்தனமான ஆட்சிக்கும் அடக்குமுறைகளுக்கும் தக்க பதிலடியினை இம்முறை ஊவா மாகாண தேர்தலில் மக்கள் வெளிப்படுத்துவார்கள். கடந்த இரு மாகாண சபைத் தேர்தலிலும் மக்கள் அரசாங்கத்திற்கு சிவப்பு விளக்கு சமிக்ஞையினை காட்டி எச்சரித்துள்ளனர். அதேநிலைமை அல்லது அதை விட மோசமான நிலைமையினை இம்முறை ஊவா மாகாண தேர்தலில் மக்கள் வெளிப்படுத்துவார்கள் எனவும் தெரிவித்தார்.
Post a Comment