'பௌத்த பிக்குகள் பொல்லுகளுடன் மக்களை அச்சுறுத்துகின்றனர், ஞானசாரர் பௌத்தத்தை இழிவுபடுத்துகிறார்'

மாலம்பே சீலரட்ன தேரர்  பொதுபல சேனா இயக்கத்தின் பொதுச் செயலாளர் கலபொடத்தே ஞானசார தேரர் பௌத்த மதத்தையே இழிவுபடுத்தி வருகின்றார் என ஐக்கிய தேசிய பிக்குகள் முன்னணியின் துணைத் தலைவர்  மாலம்பே சீலரட்ன தேரர் தெரிவித்துள்ளார்.

பௌத்த பிக்குகள் குண்டர்களைப் போன்று செயற்பட மாட்டார்கள் எனவும், இவர் ஒட்டுமொத்த மத விழுமியங்களையும் அபகீர்த்தி படுத்தி வருவதாகவும் சீலரட்ன தேரர் குற்றம் சுமத்தியுள்ளார்.

பௌத்த பிக்குகள் கருணையை போதிக்க வேண்டியவர்கள் எனவும் தற்போது ஒரு சில பௌத்த பிக்குகள் பொல்லுகளுடன் மக்களை அச்சுறுத்தி வருவதாகவும் அவர் தெரிவித்துள்ளார்.

பௌத்த பிக்குகளை குண்டர்களாகவும் பயங்கரவாதிகளாகவும் சமூகம் நோக்கும் அளவிற்கு மாற்றமடைந்துள்ளது என அவர் குறிப்பிட்டுள்ளார்.

பொதுபல சேனா, கலபொடத்தே ஞானசார தேரர் போன்றவர்கள் பௌத்த மதத்தையும், பிக்குகளையும் இழிவுபடுத்தும் வகையில் செயற்பட்டு வருவதாகத் தெரிவித்துள்ளார். பொதுபல சேனா இயக்கத்தின் நடவடிக்கைகளை 90 வீதமான பௌத்த பிக்குகள் அங்கீகரிப்பதில்லை என அவர் சுட்டிக்காட்யுள்ளர்.

இவ்வாறான ஓர் நிலைமை நீடித்தால் பெற்றோர் தங்களது பிள்ளைகளை பௌத்த துறவறத்திற்காக வழங்க மாட்டார்கள் எனவும், இது குறித்து மாநாயக்க தேரர்கள் கூடுதல் கவனம் செலுத்த வேண்டுமென குறிப்பிட்டுள்ளார். பொதுபல சேனா இயக்கத்தினர் சட்டத்தை கையில் எடுத்துக் கொண்டு செயற்பட்டு வருவதாகத் தெரிவித்துள்ளார்.

பொதுபல சேனாவுடன் தொடர்பில்லை என குறிப்பிட பாதுகாப்புச் செயலாளர் எதற்காக நீண்டகாலத்தை எடுத்துக் கொண்டார் என அவர் கேள்வி எழுப்பியுள்ளார். பொதுபல இயக்கத்தை தடை செய்ய வேண்டுமென அவர் குறிப்பிட்டுள்ளார்.