அமைச்சர் பந்துல குணவர்த்தனாவின் மகன் பொலிஸாரிடம் சரண்

மாத்தறை பொலிஸில் இன்று 05-03-2014 சரணடைந்துள்ள கல்வியமைச்சர் பந்துல குணவர்த்தனவின் மகனை காவலில் வைத்துள்ளதாக பொலிஸ் ஊடகப் பேச்சாளர் அஜித் ரோஹன தெரிவித்தார்.

கடந்த 20ம் திகதி மாத்தறை பிரதேசத்தில் மஞ்சற்கடவையால் நடந்து சென்ற குடும்பஸ்தர் ஒருவர் மீது அமைச்சரின் மகன் ஜீப் வண்டியால் மோதிவிட்டுச் சென்றுள்ளார். இவ்விபத்துச் சம்பவத்தின் போது காயமடைந்த குடும்பஸ்தர் நேற்று மாலை சிகிச்சைகள் பலனின்றி உயிரிழந்தார்.

இந்நிலையிலேயே, அமைச்சர் பந்துலவின் மகன் இன்று காலை பொலிஸில் சரணடைந்துள்ளார். இவரை இன்று மாத்தறை நீதவான் நீதிமன்றில் ஆஜர்ப்படுத்த நடவடிக்கை எடுத்துள்ளதாக பொலிஸ் பேச்சாளர் மேலும் கூறினார்.

அமைச்சரின் மகனான சத்துர பசன் குணவர்த்தன அமெரிக்காவில் கல்வி பயின்று வருகிறார். இலங்கை வந்திருக்கும் அவருக்கு சாரதி அனுமதிப் பத்திரம் இல்லை என தெரிவிக்கப்பட்டுள்ளது.

விபத்து சம்பவம் தொடர்பில் மாத்தறை பொலிஸ் நிலையத்தில் சரணடைந்த கல்வி அமைச்சர் பந்துல குணவர்த்தனவின் மகன் சத்துர பசன் குணவர்த்தன பிணையில் விடுதலை செய்யப்பட்டுள்ளார்.

மாத்தறை பொலிஸாரால் இன்று மாத்தறை பிரதான நீதவான் முன்னிலையில் சந்தேகநபர் ஆஜர் செய்யப்பட்ட போது 2 லட்சம் ரூபா சரீர பிணையில் விடுதலை செய்யப்பட்டுள்ளார்.