2018 ஆம் ஆண்டு முதல் 0/L பரீட்சையில் ஆங்கிலப் பேச்சுத் திறன் கட்டாயம்

(எம்.எம்.ஏ.ஸமட்)

2018ஆம் ஆண்டு முதல் கல்விப் பொதுத்தராதர சாதாரண தரப் பரீட்சையில் ஆங்கிலப் பேச்சுத் திறன்  கட்டாயமாக்கப்படுமென பிரதிக் கல்வி அமைச்சர் மொகான் லால் கிரேரு குறிப்பிடுகிறார்.

இது குறித்து பிரதி அமைச்சர் மேலும் குறிப்பிடுவதாவது,

கல்வித் துறையில் ஆங்கிலமும் தொழில்நுட்பமும் முக்கியமானதொன்றாகவுள்ளன. எதிர்கால சமுதாயத்தினரின் கல்வித்துறையின் முன்னேற்றத்மிற்கு ஆங்கிலமும் தொழில்நுட்பமும் இன்றியமையாதது.

இவற்றைக்கருத்திற்கொண்டு, பாடசாலை மாணவர்களிடையே ஆங்கில மொழிப்  பேச்சுத் திறனை விருத்தி செய்வதற்கான நடவடிக்கைகள் கல்வி அமைச்சினால் முன்னெடுக்கப்பட்டுள்ளது,

பிரின்ஸ் ஓப் வோல்ஸ் கல்லூரியும் ஹோமாகம மஹிந்த ராஜபக்ஷ கல்லூரியும் ஆங்கிலப் பேச்சு பாடசாலைகளாக பெயர் சூட்டப்பட்டுள்ளன. 

அடுத்த வருடத்திலிருந்து தரம் 6 முதல் 8 வரையான மாணவர்களிடையே பாடசாலை மட்டத்தில் அவர்களின் ஆங்கில மொழிப் பேச்சுத்திறன் பரிசோதிக்கப்படும். அதற்காக 20 புள்ளிகள் வழங்கப்படவுள்ளதாக அவர் குறிப்பிடுகிறார்.

அத்துடன், 2018ஆம் ஆண்டு முதல்; கல்விப் பொதுத்தராதர சாதாரண தரப் பரீட்சையில் ஆங்கிலப் பேச்சுத் திறன் பரீட்சை கட்டாயமாக்கப்படவுள்ளது.

ஆங்கிலப் மொழிப் பேச்சுத் திறனானது அபிவிருத்தி  அடைந்து வரும் நாடுகளைச் சார்ந்த மக்களுக்கு  கட்டாயமானது. ஏனெனில், ஏனைய நாடுகளிலுள்ள மக்களுடன் தொடர்பு கொள்ளவும் இளைஞர்கள் தங்களது திறமைகளை வெளிப்படுத்தி நாட்டை அபிவிருத்தி செய்யவும் ஆங்கில பேச்சுத் திறன் அவசியமென அவர் தெரிவிக்கிறார்.

நமது நாட்டில் பல உற்பத்தியாளர்கள் உள்ளனர். ஆனால் அவர்களின் ஆங்கில பேச்சுத் திறன் போதாமை அல்லது இல்லாமையின் காரணமாக தங்களது உற்பத்திகளை வெளிநாட்டுச் சந்தைகளில் அறிமுகப்படுத்த முடியாத நிலை காணப்படுவதாகவும் அதனால் ஆங்கிலப் பேச்சுத்திறனை வளர்த்துக்கொள்வது அதி முக்கியமென பிரதி அமைச்சர் மேலும் குறிப்பிடுகிறாh.;