நீர் நிலையில் விழுந்து 3 வயது சிறுவன் வபாத்

(JM.Hafeez + Ashik)

வத்துகாமம் பொலீஸ்பிரிவிலுள்ள மடவளைப் பிரதேசத்தில் மூன்று வயதுச் சிறுவன் ஒருவன் பாலடைந்த நீர் நிலை ஒன்றில் விழுந்து மரணமான சம்பவம் ஒன்று இடம் பெற்றுள்ளது.

மடவளையிலுள்ள அயற்கிராமமான புகையிலைத் தோட்டம் என்ற பகுதியில் பெற்றோருடன் வசித்து வந்த மொகமட் ராயிப் என்ற மூன்றுவயதுச் சிறுவனே இவ்வாறு பரிதாபகரமாக மரணமடைந்துள்ளான்.

(நேற்று -12.2.2014) பின்னேரம் வீட்டிலுள்ளவர்கள் மரண வீட ஒன்றுக்குச் சென்ற சமயம் மேற்படி சிறுவன் இன்னொறு சிறுவனுடன் பட்டம் விட்டுக் கொண்டிருந்த சமயம் இவ்விபத்து ஏற்பட்டுள்ளது. உடன் இருந்த சிறுவன் இதன் பாரதூரம் தெரியாது இது பற்றி ஏதும் தெரிவிக்கவில்லை எனத் தெரிவிக்கப்பட்டுள்ளது. வீட்டில் பெண்கள் மட்டும் இருந்ததால் அவர்கள் பிள்ளை விடயத்தில் அசட்டையாக இருந்துள்ளனர்.

அவ்வழியாகச் சென்ற ஒருவர் நீர் குட்டையில் பாதணி ஒன்று மிதப்பதைக் கண்டதன் மூலமே விடயம் தெரியவந்துள்ளதாகவும் அதன் பின்பே சிறுவனை வைத்திய சாலைக்கு எடுத்துச் சென்றதாகவும் அவர் பொலீஸாருக்குத் தெரிவித்துள்ளார்.

சம்பவம் நடந்து சுமார் 30 நிமிடங்களுக்கு மேல் கழிந்து விட்டதன் காரணமாக ஏற்கனவே உயிர் பிரிந்த நிலையில் சடலத்தை வைத்திய சாலைக்கு எடுத்துச் சென்றுள்ளனர். சிறுவனின் உயிரைக் காப்பாற்ற முடியவில்லை. வத்தேகம பொலீஸார் இது தொடர்பாக விசாரணைகளை மேற்கொண்டுள்ளனர்.