ஹஜ் நிகழ்வுகளை அறிவிக்க, சவுதி அரேபியா பயணமானார்

 (எஸ்.அன்சப் இலாஹி)

அக்கரைப்பற்று பட்டியடிப்பிட்டியை சேர்ந்த சிரேஷ்ட அறிவிப்பாளர் எஸ்.ரபீக், சவுதி அரேபிய கலாசார அமைச்சினால் தெரிவு செய்யப்பட்டு, இலங்கை ஒலிபரப்புக்கூட்டுத்தாபனத்தின் பிரதிநிதியாக ஹஜ் கடமைகளை மேற்கொள்ளவும், நேரடியாக ஹஜ் நிகழ்வுகளை தொகுத்து வழங்கவும் அண்மையில் சவுதி அரேபியா பயணமானார்.

இலங்கை ஒலிபரப்புக்கூட்டுத்தாபனத்தின் ஆங்கிலம் மற்றும் தமிழ்மொழிமூல சிரேஷ்ட அறிவிப்பாளராகவும், அக்கரைப்பற்றில் இயங்கிவரும் பிராந்திய வானொலி பிறை எப்.எம். இன் சந்தைப்படுத்தல் முகாமையாளராகவும், தொழில்நுட்பக் கல்லூரியில் பகுதிநேர ஆங்கில விரிவுரையாளராகவும் கடமையாற்றிவரும் இவர், இவ்வருடம் புனித மக்கா மற்றும் மதீனாவில் இடம்பெறும் இறுதிக்கடமையான ஹஜ் நிகழ்வுகளை புனித மக்காவில் இருந்தும் மதீனாவில் இருந்தும் நேரடியாக இலங்கை ஒலிபரப்புக்கூட்டுத்தாபனம், பிறை எப்.எம் வானொலிகளுக்கு வழங்கவுள்ளார்.

இவர் இலங்கை ஒலிபரப்புக்கூட்டுத்தாபனத்தின் தென்றல் மற்றும் பிராந்திய சேவைகளான யாழ் சேவை, கந்துரட்ட சேவை, பிறை எப்.எம். வனொலிகளில் அறிவிப்பாளராக கடமையாற்றி பலவருட அனுபவம் பெற்றவர் ஆவார்.