மாத்தளையில் பூதம் நடமாடுகிறதாம் - அடையாளம் காணப்பட்டுள்ளது என்கிறது பொலிஸ்

மாத்தளை இரத்தோட்டை பிரதேசத்தில் பூதம் ஒன்று நடமாடுவதாக கூறப்படும் சம்பவம் காரணமாக பிரதேச மக்களிடம் அச்சம் நிலவுவதாக தகவல்கள் தெரிவித்தன.

கற்களை வீசி தாக்குவது, வீடுகள் மற்றும் சொத்துக்களுக்கு இந்த பூதம் என்ற கூறப்படும் நபரினால் சேதம் ஏற்படுத்தப்படுவதாகவும் இதனால் பல வீடுகளுக்கு பலத்த சேதம் ஏற்பட்டுள்ளதாகவும் தெரியவருகிறது.

வீடொன்றுக்கு அருகில் நிறுத்தி வைக்கப்பட்டிருந்த முச்சக்கர வண்டியும் இவ்வாறு சேதமாக்கப்பட்டுள்ளது. பிரதேசவாசிகளான இளைஞர்கள் நேற்று அதிகாலை பூதம் எனக் கூறப்படும் நபரை பிடித்துள்ளதுடன் அவர் அவர்களிடம் இருந்து தப்பிச் சென்றுள்ளார்.

பூதம் எனக் கூறப்படும் நபர் அடையாளம் காணப்பட்டுள்ளதால் அவரை கைது செய்து சட்ட நடவடிக்கை எடுக்கப்படும் என இரத்தோட்டை பொலிஸ் நிலைய பொறுப்பதிகாரி சிசிர பண்டார தெரிவித்தார்.