முஸ்லிம் அமைச்சர்களுக்கு ஞானசார தேரர் சவால்..!

இலங்கையில் முஸ்லிம் அடிப்படைவாதம் செயற்பாட்டில் இருப்பதாக பாதுகாப்புச் செயலாளர் கூறும் நிலையில் அப்படி எதுவும் இலங்கையில் இல்லை என்று உறுதிப்படுத்த முஸ்லிம் அமைச்சர்களிடம் ஆதாரங்கள் இருக்கின்றனவா என பொதுபல சேனா அமைப்பின் செயலாளர் கலகொட அத்தே ஞானசார தேரர் கேள்வி எழுப்பினார்.

கொழும்பு கிருளபனையில் நேற்று நடத்திய செய்தியாளர் சந்திப்பில் அவர் இதனை கூறினார். அவர் மேலும் தெரிவிக்கையில்,

பாதுகாப்பு தரப்பினர் வெறுமனே தகவல்களை வெளியிட மாட்டார்கள். முஸ்லிம் அடிப்படைவாதம் இலங்கையில் இல்லை என்று கூறும் அமைச்சர்கள், யூசுப் அல் கர்ளாவி என்ற அடிப்படைவாதியுடன் ரகசிய பேச்சுக்களை நடத்தியமைக்கான ஆதாரங்கள் உள்ளன.

முஸ்லிம் இனத்திற்கு தொடர்ந்தும் இடர்பாடுகளை ஏற்படுத்தி வருவதாக முஸ்லிம் அமைச்சர்கள் குற்றம் சுமத்துகின்றனர். எனினும் முஸ்லிம் இனத்தவர்களே ஆடைகளை அணிவதிலும் உணவு முறையிலும் தம்மை தனியாக அடையாளப்படுத்தி பிரிந்து செல்ல முயற்சித்து வருகின்றனர்.

இலங்கையில் இஸ்வான், எஸ்.எல்.டி.ஜே, பீ.எம்.ஜீ.ஜீ, எஸ்.ஜீ.ஜீ, பீ.எம்.ஜே.டி ஆகிய பெயர்களில் சில புதிய முஸ்லிம் அடிப்படைவாத அமைப்புகள் செயற்பட ஆரம்பித்துள்ளன. இஸ்வான் அமைப்புக்கும் தமிழ்த் தேசியக் கூட்டமைப்புக்கும் இடையில் தொடர்புகள் இருக்கின்றன என்றார்.