தம்புள்ள பள்ளி அகற்றப்படுமா? இல்லையா? தேர்தலுக்கு முன் பதில் பெற்றுத்தர கோரிக்கை

மாத்தளை மாவட்டம் தம்புள்ள பள்ளிவாசலை அகற்றுவது தொடர்பாக தற்போது எழுந்துள்ள பிரச்சினைக்கு ஜனாதிபதியிடமிருந்து உறுதியான பதிலை எதிர்பார்க்கும் வகையில் பள்ளிவாசல் நிர்வாகத்தினால் தீர்மானம் ஒன்று எடுக்கப்பட்டுள்ளது.

வெள்ளிக்கிழமை 13-09-2013 நண்பகல் ஜும்மா தொழுகையின் பின்னர் நடைபெற்ற பள்ளிவாசல் நிர்வாகசபை கூட்டத்திலே இந்தத் தீர்மானம் எடுக்கப்பட்டுள்ளது.

தம்புள்ள புனித பூமித் திட்டத்தின் கீழ் அடையாளமிடப்பட்டுள்ள அபிவிருத்தி திட்டத்தின் கீழ், நெடுஞசாலை விஸ்தரிப்புக்காக பள்ளிவாசல் அகற்றப்படவிருப்பதாக பள்ளிவாசல் நிர்வாகம் கூறுகின்றது.

''ஏற்கனவே முஸ்லிம் நாடாளுமன்ற உறுப்பினர்களும் அமைச்சர்களும் பள்ளிவாசல் அகற்றப்படமாட்டாது என ஜனாதிபதி என உறுதி வழங்கியுள்ளதாக அறிவித்திருந்தார்கள். ஆனால் தற்போது அகற்றுவதற்கு அடையாளமிடப்பட்டுள்து. இதன் காரணமாகவே இந்த தீர்மானத்தை தாங்கள் கூடி எடுத்ததாக'' பள்ளிவாசல் நிர்வாக சபையின் துணைச் செயலாளரான சாகுல் ஹமீத் மொகமட் ரவூப் கூறுகின்றார். 

மூன்று தினங்களுக்கு முன்னர் நெடுஞ்சாலைகள் அபிவிருத்தி அதிகார வாரியத்தினால் பள்ளிவாசல் எல்லைக்குள் அடையாளமிடப்பட்ட தடயங்களை இன்று அகற்றுவதற்கு குறித்த வாரியத்தின் அதிகாரிகள் அங்கு வந்த போது தங்களால் அதற்கு இடமளிக்கப்படவில்லை என்றும் அவர் தெரிவிக்கின்றார்.

பள்ளிவாசல் நிர்வாகத்தினால் இன்று எடுக்கப்பட்டுள்ள தீர்மானத்தில் பள்ளிவாசல் அகற்றப்படுமா? இல்லையா ? என ஜனாதிபதியின் பதிலை முஸ்லிம் நாடாளுமன்ற உறுப்பினர்களும் அமைச்சர்களும் எதிர்வரும் 21ம் திகதி மாகாண சபை தேர்தலுக்கு முன்னதாக பெற்றுத் தர வேண்டும் என்று கூறப்பட்டுள்ளது.

மாத்தளை மாவட்டத்தை உள்ளடக்கிய மத்திய மாகாண சபைக்கான தேர்தலும் அன்றைய தினம் நடைபெறுகின்றது.

நீதி அமைச்சர் ரவூப் ஹக்கீம் பள்ளிவாசல்க்கு விஜயம் செய்து பள்ளிவாசல் நிர்வாகிகளுடன் தற்போது உருவாகியுள்ள பிரச்சினைகள் தொடர்பாக விபரங்களை கேட்டறிந்தார்.  எதிர்வரும் வியாழக்கிழமை அமைச்சரவை கூட்டத்தில் கலந்து கொள்ளும் போது ஜனாதிபதியின் நேரடி கவனத்திற்கு இதனை கொண்டு வருவதாக அவர் உறுதியளித்துள்ளார். bbc