ரணில் விக்ரமசிங்கவை சந்திரிக்காவுடன் ஒப்பிடாதீர்கள் - திஸ்ஸ அத்தநாயக்க

ரணில் விக்ரமசிங்க மற்றும் முன்னாள் ஜனாதிபதி சந்திரிக்கா குமாரதுங்க ஆகிய இரண்டு பேரையும் சமமாக மதிப்பிட முடியாது என ஐக்கிய தேசியக்கட்சியின் பொதுச் செயலாளர் திஸ்ஸ அத்தநாயக்க தெரிவித்தார்.

கொழும்பில் இன்று நடைபெற்ற ஊடகவியலாளர் சந்திப்பில் அவர் இதனை குறிப்பிட்டார். அவர் மேலும் தெரிவிக்கையில்,

எதிர்வரும் மாகாண சபைத் தேர்தலில் ஐக்கிய தேசியக்கட்சியின் தலைவர் மேல் மாகாண சபையின் முதலமைச்சர் பதவிக்கு போட்டியிட உள்ளதாக ஊடகங்களில் வெளியாகியுள்ள தகவல்கள் உண்மைக்கு புறம்பானவை.

அதேவேளை தென் மாகாண சபைத் தேர்தலில் முதலமைச்சர் வேட்பாளராக போட்டியிடுமாறு சஜித் பிரேமதாசவுக்கு எவராவது யோசனை முன்வைத்தால் அதனை ஏற்றுக்கொள்ளவும் நிராகரிக்கவும் அவருக்கு உரிமை உள்ளது.

ஐக்கிய தேசியக் கட்சியை விற்று பிழைப்பவர்கள் போன்று கட்சியை வலுவிழக்க செய்யும் தரப்பினரும் உள்ளனர்.

ரணில் விக்ரமசிங்கவுடன் முன்னாள் ஜனாதிபதி சந்திரிக்காவை சமமாக ஒப்பிட முடியாது. ரணில் விக்ரமசிங்க அரசியலில் சிறந்த அனுபவங்களை கொண்டுள்ளதுடன் நாட்டில் இரண்டு முறை பிரதமராக பதவி வகித்த சிரேஷ்ட அரசியல்வாதி என்றார்.

ஐக்கிய தேசியக்கட்சியின் தலைவர் ரணில் விக்ரமசிங்க, முன்னாள் ஜனாதிபதி சந்திரிக்காவுடன் இணைந்து எதிர்வரும் ஜனாதிபதி தேர்தலில் போட்டியிட உள்ளதாக ஊடகங்களில் தகவல்கள் வெளியாகியிருந்தன.