எதனைக் கிழித்து விட்டீர்கள்...?

(ஏ.எல்.ஜுனைதீன்)

  முஸ்லிம் மக்களைப் பொறுத்தவரையில் நடைபெறவிருக்கும் இந்த தேர்தலில் உண்மையில் அரசாங்கத்தின் மீதான பல வெறுப்புணர்வுகள் காணப்படுவது பரவலாக நாங்கள் அறிந்த விடயமாகும். அதனால்தான் எங்கள் தலைமையை கட்சிப் போராளிகள், ஆதரவாளர்கள் அரசாங்கத்தில் தொடர்ந்தும் ஏன் இருந்து கொண்டிருக்கிறீர்கள்? எதனைக் கிழித்து விட்டீர்கள்? என்றெல்லாம் பகிரங்கமாக குற்றம் சுமத்திப் பேசுகின்றார்கள்.  இப்படி இவர்கள் பேசுவதற்கும் காரணம் இருக்கின்றது. உண்மையில் அரசாங்கம்  சில விடயங்களில் மெத்தனப் போக்குடன் காணப்படுவதனால் முஸ்லிம் மக்கள் மத்தியில் அதிருப்தி நிலை காணப்படுகின்றது. என ஸ்ரீலங்கா முஸ்லிம் காங்கிரஸ் நாடாளுமன்ற உறுப்பினர் எச்.எம்.எம். ஹரீஸ் இன்று  (2013.09.15) ஞாயிற்றுக்கிழமை சக்தி தொலைக் காட்சியில் இடம்பெற்ற மின்னல் நிகழ்ச்சியில் கலந்து கொண்டு கருத்து தெரிவிக்கையில் தெரிவித்தார். நாடாளுமன்ற உறுப்பினர் இந் நிகழ்ச்சியில் தொடர்ந்து கருத்து தெரிவிக்கையில் மேலும் கூறியதாவது,

  அண்மையில் தோற்றம் பெற்ற இனவாத அமைப்புக்கள் குறிப்பாக பொதுபல சேனா  போன்ற அமைப்புக்கள் தொடர்ச்சியாக முஸ்லிம் மக்களை பாதிக்கும் வண்ணம் செயல்பட்டு வருகின்றது.  அந்த இயக்கம் முஸ்லிம் வழிபாட்டுத் தளங்கள், முஸ்லிம் பெண்களின் உடை அமைப்புக்கள் என்பனவற்றில் விமர்சனங்களைச் செய்து முஸ்லிம்களை நெருக்கடிக்கு உள்ளாக்குகின்ற விடயங்கள் மக்கள் மத்தியில் கவலையைத் தோற்றுவித்திருக்கிறது.

 ஏன் இதனை ஆட்சியாளர்கள் கட்டுப்படுத்த முடியாது? இந்நாட்டிலிருந்து செயல்பட்ட சக்திமிக்க விடுதலைப் புலிகளைக் கட்டுப்படுத்திய இந்த அரசாங்கம் சிறு, சிறு குழுக்களாக இயங்கும் இந்த அமைப்புக்களைக் கட்டுப்படுத்தி  இந்நாட்டில் வாழும் முஸ்லிம் மக்களின் மத உரிமைகளைப் பாதுகாக்க ஏன் முன் வருவதாக இல்லை என்ற பிரச்சினை புதிதாக எழுந்துள்ளது.

  இதுமட்டுமல்லாமல், கிழக்கு மாகாணத்தில் குறிப்பாக பல காணி சுவிகரிப்பு நடவடிக்கைகள் இன்று ஏற்பட்டிருக்கிறது. நேற்றுக்கூட புல்மோட்டையில்  முஸ்லிம்களுக்குச் சொந்தமான கிட்டத்தட்ட இரண்டாயிரம் ஏக்கர் நிலங்கள் அதுவும் தனியார்களுக்குச் சொந்தமான உறுதிகளைக் கொண்ட நிலங்களைக் அங்கிருக்கும் கச்சேரி நிர்வாகம் கடுமையாக புதை பொருள் ஆராய்ச்சி என்ற அடிப்படையில் கைப்பற்றுவதற்கு முயற்சிகளை மேற்கொண்டு வருகின்றது. இதற்காக அங்கிருக்கும் மாகாண சபை உறுப்பினர் அன்வர் உட்பட பள்ளிவாசல் தலைவர் ஆகியோரை பொலிஸார் நீதிமன்றத்தில் ஆஜர்படுத்தக்கூடிய அளவுக்கு நிலைமை மோசமாகியுள்ளது.

  இது போன்ற நிலைதான் அம்பாறை மாவட்டத்திலும் குறிப்பாக பொத்துவில் பிரதேசத்திலும் காணப்படுகின்றது. இவை எல்லாவற்றையும் ஒட்டு மொத்தமாகப் பார்க்கின்ற பொழுதும், அதைபோன்று தென் இலங்கையில் வாழ்கின்ற முஸ்லிம்களின் பிரச்சினை மற்றும் வர்த்தக ரீதியிலான நெருக்கடி என்பனவற்றிக்கான அடிப்படைக் காரணங்களைக் கண்டறிந்தும் அரசாங்கம் தகுந்த நடவடிக்கை எடுக்காமல் இருப்பதன் காரணமாக இன்று கட்சிக்கும் எங்களுக்கும் பல அழுத்தங்கள் வந்து கொண்டிருக்கின்றது.

  இருந்தாலும், ஒரு விடயத்தில் ஸ்ரீலங்கா முஸ்லிம் காங்கிரஸ் தெளிவாக இருக்கின்றது. எமது கட்சியின் நடவடிக்கைகள் இந்த நிலைப்பாட்டில் நாங்கள் இருக்கின்ற பொழுது அரசாங்கத்தை உள்ளுக்குள் இருந்து இந்த விடயங்களைக் கட்டுப்படுத்துகின்ற நடவடிக்கைகளை நாங்கள் பல வருடங்களாக மிகத் தீவிரமாக ஈடுபட்டு வருகின்றோம்.

  குறிப்பாக பள்ளிவாசல்கள் பிரச்சினைகள் வந்தபோது கூட ஸ்ரீலங்கா முஸ்லிம் காங்கிரஸ் காத்திரமான நடவடிக்கைகளை மேற்கொண்டிருந்தது.  சர்வதேச கொழும்பிலுள்ள இராஜதந்திரிகள் ஊடாக அரசுக்கு இது குறித்து அழுத்தங்களைக் கொடுத்துள்ளோம். இப்படியாக பல விடயங்களில் முஸ்லிம் காங்கிரஸ் இன்று வரை அரசுக்குள் இருந்து போராடி வருகின்றது.

  ஐக்கிய தேசியக் கட்சியைப் பொறுத்த மட்டில் இன்று அக்கட்சி கனவு உலகத்தில் இருந்து கொண்டிருக்கிறது. அவர்களுக்கு இந்நாட்டில் 29 சதவீத வாக்குகள் இருந்து கொண்டிருக்கின்றதும் ஏனைய தமிழ், முஸ்லிம் வாக்குகளைச் சேர்த்தால் 45 சத வீதமான வாக்குகளைப் பெற்று ஆட்சி அதிகாரத்தைப் பெற்றுக் கொள்ளலாம் என்று அக்கட்சி நினைக்கின்றது.

  ஆனால், நடைபெறவிருக்கும் மாகாண சபைத் தேர்தலில் குறிப்பாகக் கண்டி மாவட்டத்தில் வேட்பாளர்களாக 7 முஸ்லிம்களை நிறுத்தி அம்மாகாணத்தில் வழமையாக தெரிவாகி வருகின்ற முஸ்லிம் மாகாண சபை உறுப்பினர்களை இல்லாமல் செய்வதற்கான ஒரு முயற்சி மேற்கொள்ளப்பட்டிருக்கிறது. இந்தக் கால கட்டத்தில் முஸ்லிம் சமூகம்,  தமிழ், முஸ்லிம் அடிப்படையில் தமது அரசியல் பயணத்தை ஆரம்பிக்க வேண்டும்.என முஸ்லிம் சமூகத்திடம் ஒரு வேண்டுகோளை விடுக்க விரும்புகின்றேன்.

  பயங்கரவாதச் செயல்கள் சம்மந்தமான நடவடிக்கைகளில் முஸ்லிம்களில் ஒரு குழு இயங்குகின்றது என பாதுகாப்புச் செயலாளர் வெளியிட்ட பொழுது முதன் முதலாக தனது கண்டணத்தைத் தெரிவித்த கட்சி ஸ்ரீலங்கா முஸ்லிம் காங்கிரஸாகும். அதன்  தலைமை மிகத் தெளிவாக பல பக்க அறிக்கையைக் கூட அவருக்கு அனுப்பியிருந்தது. அவரின் கூற்றில் முஸ்லிம்களுக்குள் இல்லாத ஒரு தீவிரவாதத்தை இந் நாட்டில் முஸ்லிம்களிடையே இருக்கின்றது போன்று காட்ட முற்படுகின்றது. அதனைக் கண்டித்திருக்கின்றோம். இவ்வாறு நாடாளுமன்ற உறுப்பினர் ஹரீஸ் கூறினார்.