பிறைக் குழு ஒன்று போதுமானது..!

(நாகூர் ழரீஃப்)

ஸ்ரீ லங்கா தவ்ஹீத் ஜமாஅத் ஒரு பிறைக் குழுவைத் தெரிவு செய்திருப்பதாகவும், அதன் உறுப்பினர்களின் பெயர் பட்டியலையும் அறிவித்திருந்தது.

நீண்ட நெடுங்காலமாக அகில இலங்கை ஜம்இய்யத்துல் உலமாவுடன் இணைந்து முஸ்லிம் சமய, கலாச்சார அலுவலகம், கொழும்பு பெரிய பள்ளி பிறைக் குழு மேற்படி நற்காரியத்தை செய்து வருகின்றனர். அவர்களுடன்; ஆலிம்கள், ஷரீஆ கவுன்ஸில், மேமன் சங்கம், தஃவா அமைப்புக்கள் கைகோர்த்து செயற்படுகின்றன என்பது நாம் அறிந்த உண்மையாகும்.

இவர்களது இப்பாரிய பணியினை சமூகம் நன்றி உணர்வுடன் நோக்க வேண்டும். ஓவ்வொரு மாதமும் பிறை பார்க்கும் மாநாட்டினை இவர்கள் தவறாது செய்து வருகின்றனர். இவர்களுக்குத் துணையாக முஸ்லிம் வானியல் அறிஞர்களும் உள்ளனர்.

இதுகால வரை செய்யப்பட்டு வரும் மேற்படி நற்காரியத்தைக் குழப்பியடிக்க பலர் கங்கணம் கட்டிய வண்ணம் இருந்தனர். இவர்களது எதிர்பார்ப்புக்கமைய கடந்த ஷவ்வால் மாதத்திற்கான தலைப் பிறை தீர்மாணத்திலும் சில கருத்து முரண்பாடுகள் ஏற்பட்டுவிட்டன. 'குருவியும் அமர, பலாக்காயும் விழுந்தது' என்ற கதையாகிவிட்டது. இதனை வெடிக்கச் செய்தவர்களில் முக்கிய பங்கெடுத்தவர்கள் மேற்படி ஸ்ரீ லங்கா தவ்ஹீத் ஜமாஅத் அமைப்பினர்தான்.

இவர்களுக்கும் தேசிய பிறைக்கும் என்ன சம்பந்தம் இருக்கிறது என்பது பலருக்கும் ஐயத்தையே ஏற்படுத்தியுள்ளது. தலைமை விடும் பிழைகள் என்னும் இவர்கள், அகில இலங்கை ஜம்இய்யத்துல் உலமாவின் தலைமையை ஏற்றிருந்தார்களா?

மதிப்புக்குறிய அஷ் ஷைக் எம்.எம்.ஏ. முபாறக் (மதனி) அவர்களையும், அஷ் ஷைக் எம்.ஐ.எம். றிஸ்வி (முஃப்தி) அவர்களையும் பிறைக் குழுவையும் திட்டித் தீர்த்த இவர்கள், தமது கொள்கையை ஏற்காதவர்களான அமைப்புக்களையும், ஆலிம்களையும் ஏற்றுக் கொள்ளத இவர்கள் எப்படித் தலைமையைப் பற்றிப் பேசலாம்?

முழு முஸ்லிம் சமூகத்தையும் வழிகேடர்கள் என்று பகிரங்கமாகச் செல்லும், எழுதும் இவர்கள் யாருக்குப் பிறையைப் பற்றி அறிவிக்கப் போகிறார்கள்? வழிகேடர்களுக்கா?

சமூகத்தைப் பிளவு படுத்துவதில் சிலருக்கு அமோக ஆனந்தம். நாட்டு நடப்புக்களையும் சமூகம் எதிர் கொள்ளும் ஆபத்துக்களையும் கருத்திற் கொண்டு, தனக்கொரு பிறைக் குழு என்ற மேற்படி வாதத்தினை ஸ்ரீ லங்கா தவ்ஹீத் ஜமாஅத் கைவிட வேண்டும் என அன்பாயக் கேட்டுக் கொள்கின்றோம்.

நீங்கள் சார்ந்த அமைப்பினருக்கு நீங்கள் விரும்பும் முறைகளில் எதையும் அறியப்படுத்துங்கள். அவர்களுக்கு உங்கள் இணையத் தளம் மாத்திரம் போதுமானதல்லவா? அப்படியாயின் தேசிய ரீதியில் பிறைக் குழு எதற்காக? தேசிய பத்திரிகையில் எதற்காக?

நளீமிகளைத் துற்றும் இவர்களுக்கு அஷ் ஷைக் ஜாபிர் நளீமி மாத்திரம் எப்படி நம்பகமானவரானார்? ஜம்இய்யத்துல் உலமாவினை ஏற்காத இவர்களுக்கு கிண்ணியா ஜம்இய்யத்துல் உலமா மாத்திரம் எப்படி சரியாகப் பட்டது? அதன் தீர்மாணம் எப்படி நம்பகத் தன்மை கொண்டதாக மாறியது?

எனவே, அகில இலங்கை ஜம்இய்யத்துல் உலமாவுடன் இணைந்து முஸ்லிம் சமய, கலாச்சார அலுவலகம், கொழும்பு பெரிய பள்ளி பிறைக் குழு, மற்றும் அவர்களுடன் இணைந்திருக்கும் தகுதியான ஆலிம்கள், ஷரீஆ கவுன்ஸில், மேமன் சங்கம், தஃவா அமைப்புக்கள் கைகோர்த்து செயற்படுகின்ற பிறைக் குழு ஒன்று போதுமானதாகும். இவற்றின் தீர்மாணமே தேசிய பிறையை மையமாகக் கொள்பவர்களுக்கு அதிகாரமிக்க ஏக முடிவாகும்.

அத்துடன், சர்வதேசப் பிறையை அடிப்படையாகக் கொண்டு செயற்படுபவர்கள் அவர்கள் விரும்பும் விதத்தில் சமூக ஐக்கியத்துக்கு பாதிப்புக்கள் ஏற்படா வண்ணம் செயற்படலாம். எனினும், சர்வதேசப் பிறையைத் தீர்மாணிக்கும் அதிகாரமுடைய எவரும் எங்கும் இல்லை என்பதுவும் குறிப்பிடப்பட வேண்டிய ஒரு முக்கிய விடயமாகும்.