சீனாவில் 40 கோடி மக்களுக்கு, அந்நாட்டின் தேசிய மொழி தெரியவில்லை

சீனாவில், 40 கோடி மக்களுக்கு, அந்நாட்டின் தேசிய மொழியான, "மான்டரின்' தெரியவில்லை, என அந்நாட்டு கல்வித் துறை அமைச்சகம் தெரிவித்துள்ளது. சீனாவில், 135 கோடி மக்கள் வசிக்கின்றனர். பல்வேறு மாகாணங்களில், பலவித மொழிகள் பேசப்படுகின்றன. இருப்பினும், "மான்டரின்' மொழி தேசிய மொழியாக பின்பற்றப்படுகிறது. ஆனால், மூன்றில் ஒரு பங்கு மக்களுக்கு, தேசிய மொழியில் சரளமாக பேசத் தெரியவில்லை என்று, அந்நாட்டு கல்வித் துறை அமைச்சகம் கவலை தெரிவித்துள்ளது.

மான்டரின் மொழியை ஊக்குவிக்கும் வகையில், கடந்த, 1998ல் இருந்து, ஒவ்வொரு ஆண்டும், செப்டம்பர் மாதம், மூன்றாவது வாரம், சிறப்பு முகாம்களை, சீன அரசு நடத்தி வருகிறது.

இது தொடர்பாக, சமீபத்தில் நடந்த விழாவில், பங்கேற்ற கல்வி அமைச்சக அதிகாரி குறிப்பிடுகையில், "நாட்டில் உள்ள, 40 கோடி மக்களுக்கு, மான்டரின் மொழியில் பேசவோ, எழுதவோ தெரியாது. மீதமுள்ள மக்களில் மூன்றில் ஒரு பங்கினருக்கு, இந்த மொழியை சரியாக பேசத் தெரியாது' என்றார்.