கிராண்ட்பாஸ் பள்ளிவாசல் தாக்குதல் - சதிகார கும்பலின் திட்டமிடப்பட்ட செயற்பாடு

(தினகரன்) கொழும்பு, கிராண்ட்பாஸ், சுவர்ண சைத்திய வீதியில் அமைந்துள்ள ‘மஸ்ஜிதுல் தீனுல் இஸ்லாம்’ பள்ளிவாசல் மீது தாக்குதல் நடத்தப்பட்ட சம்பவத்திற்கு சர்வமதத் தலைவர்கள் கண்டனம் தெரிவித்துள்ளனர்.

இலங்கையில் பாரிய இனக் குரோதம் நிலவுவதாக சர்வதேசத்திற்கு காட்சிப்படுத்த முயற்சிக்கும் சதிகார கும்பலின் திட்டமிடப்பட்ட செயற்பாடுகளின் பிரதிபலிப்பே கிராண்ட்பாஸ் பள்ளிவாசல் தாக்குதல் என்பதனால் இவ்வாறான செய்கைகளுக்கு துணைபோக வேண்டாமென தேசிய ஐக்கியத்துக்கான சர்வமதங்கள் கூட்டமைப்பு நாட்டு மக்களை கேட்டுக்கொண் டுள்ளது.

பொதுநலவாய உச்சி மாநாட்டை முன்னிட்டு உலக நாடுகளின் தலைவர்கள் இலங்கை வருவதனை பொறுத்துக்கொள்ளாத தேசத்துரோகிகள் இனங் களிடையே ஐக்கியமின்மையை தோற்றுவித்து அவர்களது வருகையை நிறுத்து வதற்கு முயற்சிக்கின்றனர்.

இம்மாதம் இலங்கையின் மனித உரிமைகளை பார்வையிடுவதற்காக வரவுள்ள ஐ.நா.வின் மனித உரிமைகள் ஆணையாளர் நாயகம் நவநீதம்பிள்ளைக்கு நாட்டில் இனங்களி டையே சமத்துவம் மற்றும் மனித உரிமைகள் இல்லை என்பதனை காட்டும் முகமாகவே அரசியல் பொறாமை பிடித் தவர்களால் திட்டமிட்டு கிராண்ட்பாஸ் பள்ளிவாசல் தாக்கப்பட்டிருப்பதாகவும் அவர்கள் கண்டனம் தெரிவித்தனர்.

எமது ஜனாதிபதி மஹிந்த ராஜபக்ஷ எத்தகைய பிரச்சினை தொடர்பில் எத்தரப்பினருடனும் பேச்சுவார்த்தைக்கு தயாராகவிருப்பதனால் பேசித் தீர்க்க வேண்டிய விடயங்களுக்கு வன்முறைகளை தோற்றுவிக்க வேண்டியதன் அவசியமில்லை எனவும் அவர்கள் வலியுறுத்தினர்.

நான்கின மக்கள் வாழும் இந்த இலங்கை தேசத்தில் இனப்பகைமை என்ற ஒன்று இல்லவே இல்லை. யதார்த்தமாக இடம்பெறக்கூடிய சிறு சிறு சம்பவங்களை பூதாகரமாக்கி நாட்டை பிளவுபடுத்த தீயசக்திகள் சந்தர்ப்பம் பார்த்து காத்திருக் கின்றன. மக்கள் இவர்கள் குறித்து விழிப்புணர்வுடன் இருப்பதன் மூலம் தேவையற்ற அசம்பாவிதங்கள் நாட்டில் இடம்பெறுவதனை தவிர்த்து அமைதியும் சமாதானமும் தொடர வழியமைக்க முன்வரவேண்டுமெனவும் கூட்டாக வேண்டுகோள் விடுத்தனர்.

கிராண்ட்பாஸ் பள்ளிவாசல் தாக்குதல் சம்பவத்திற்கு கண்டனம் தெரிவிக்கும் வகையில் தேசிய ஐக்கியத்துக்கான சர்வ மதங்கள் கூட்டமைப்பு நேற்று கொழும்பு பொது நூலக கேட்போர் கூடத்தில் விசேட செய்தியாளர் மாநாடு ஒன்றினை நடத்தியது. இதன்போதே கூட்டமைப்பின் தலைவர்கள் மேற்கண்ட கருத்துக்களை முன்வைத்தனர்.

கூட்டமைப்பின் இணைத் தலைவர் அல்ஹாஜ் அஸ்சேய்க் கலாநிதி ஹசன் மெளலானா செய்தியாளர்கள் மத்தியில் கருத்து தெரி விக்கையில்; இலங்கையுடன் முஸ்லிம் நாடுகள் கொண்டிருக்கும் உறவினை பொறுத்துக்கொள்ளாத சில தீய சக்திகள் பெளத்தர்களுக்கும் இஸ்லாமியர் களுக்குமிடையிலான இடைவெளியை அதிகரிக்கு முகமாகவே இதுபோன்ற அநாகரிகமான செயற்பாடுகளை முன்னெ டுப்பதாக சுட்டிக்காட்டினார்.

அவர் தொடர்ந்தும் கூறுகையில்; முப்பது வருட காலமாக நாட்டை பயங்கரவாதம் ஆட்டுவித்தபோது அனைத்து இன மக்களும் ஒற்றுமையாக வாழ்ந்தனர். அவர்களுக்கு வேண்டிய தெல்லாம் சமாதானம் மாத்திரமே. என்று பயங்கரவாதம் தோற்கடிக்கப்பட்டு ஜெனீவாவில் இலங்கையின் மனித உரிமைகள் பற்றி பேசத் தொடங்கினார்களோ அதன்பின்னரே நாட்டில் இன மோதல்கள் சிறிது சிறிதாக தலைதூக்க ஆரம்பித்தன.

இலங்கைக்கெதிராக ஜெனீவாவில் மனித உரிமைகள் பேரவை கொண்டுவரப் பட்ட போது அமெரிக்காவை எதிர்த்துக் கொண்டு அனைத்து இஸ்லாமிய நாடுகளும் இலங்கைக்கு வாக்களித்தன. அதனைப் பொறுத்துக்கொள்ள முடியாமலே இனங்களுக்கிடையே குழப்பங்கள் தோற்றுவிக்கப்படுகின்றன. இதனைப் புரிந்துகொள்வதன் மூலம் நாட்டில் சீர்குலைவுகள் ஏற்படுத்த முயற்சிப்போரி டமிருந்து விலகி நடப்போமெனவும் அவர் குறிப்பிட்டார்.