முஸ்லிம் தலைவர்கள் ஒன்றை உணர்ந்துகொள்ள வேண்டும் - இரா. சம்பந்தன்

முஸ்லிம் பள்ளிவாசல்கள் தாக்கப்படுவது வேதனைக்குரிய விடயமென தமிழ் தேசியக் கூட்டமைப்பின் தலைவர் இரா. சம்பந்தன் குறிப்பிட்டுள்ளார். இதுபற்றி அவர் மேலும் குறிப்பிட்டுள்ளதாவது, 

பள்ளிவாசல்கள் தாக்கப்படுவது எவராலும் அனுமதிக்க முடியாது. இவற்றைக் கட்டுப்படுத்த வேண்டியது அரசாங்கத்தின் கடமை. இருந்தபோதும், முஸ்லிம் தலைவர்கள் ஒன்றை உணர்ந்துகொள்ள வேண்டும். நீதி அனைவருக்கும் உரித்தானது. ஐக்கிய நாடுகள் சபையின் மனிதஉரிமைப் பேரவையில் தமிழர்களுக்கு ஏற்பட்ட சில நிலைமைகள் தொடர்பாக சில தீர்மானங்களை நிறைவேற்றுவதற்கு சர்வதேச சமூகம் நடவடிக்கை எடுத்தபோது முஸ்லிம் தலைவர்கள் உண்மையான நிலைமையை உணர்ந்து செயற்பட்டிருக்கவேண்டும். ஆனால், முஸ்லிம் தலைவர்கள் அரசுக்குச் சார்பாக பல நாடுகளுக்குச் சென்று பிரசாரம் செய்தார்கள். இது வேதனைக்குரிய விடயம். இருந்தபோதும், நாம் ஒரு போதும் அநீதியை அங்கீகரிக்கமாட்டோம். இவ்வாறான சம்பவங்கள் இடம்பெற்றபோது பாராளுமன்றத்தில் இவற்றை எதிர்த்து நான் அறிக்கை ஒன்றை வெளியிட்டிருந்தேன். ஏனெனில், முஸ்லிம்களும் இந்த நாட்டில் வாழ்ந்து வந்த மக்கள். தொடர்ந்து இந்த நாட்டில் வாழ்வதற்கு அவர்களுக்கு உரித்துண்டு.

அவர்களுடைய கலை, கலாசாரம், மதத்தைப் பேணுவதற்கு அவர்களுக்கு உரித்துண்டு. அந்த உரிமை மறுக்கப்பட முடியாது. அவர்களுக்காக நாங்கள் குரல் கொடுப்போம் எங்களால் இயன்ற உதவிகளை அவர்களுக்குச் செய்வோம். அதேபோன்று முஸ்லிம் தலைவர்களும் தமிழ் மக்களுக்கு அநீதி இழைக்கப்படும் பொழுது அவற்றை உணர்ந்து செயற்பட வேண்டும்.