இடம்பெயர்ந்த முஸ்லிம்களின் துயர் துடைக்குமா வடமேல் மாகாண சபைத் தேர்தல்..?

(எம்.முஹம்மத்)

இடம்பெயர்ந்த யாழ்ப்பாண முஸ்லிம்களைப் பொருத்தமட்டில் வருகின்ற வடமாகாண சபைத் தேர்தலைவிட வடமேல் மாகாண சபைத்  தேர்தல் தான் முக்கியத்துவம் உடையதாக காணப்படுகின்றது.  யாழ்ப்பாணத்திலிருந்து வெளியேறி புத்தளம் மாவட்டத்தில் வசிக்கும் யாழ்ப்பாண முஸ்லிம் வாக்காளர்களின் எண்ணிக்கை 12000 ஆக இருக்கின்றது. மன்னார் மற்றும் முல்லைத்தீவு மாவட்டங்களையும் சேர்த்தால் இந்த எண்ணிக்கை 35000 வாக்காளர்களாக உள்ளது. இந்த எண்ணிக்கை வடமேல் மாகாண சபையில் ஆகக் குறைந்தது இரண்டு பிரதிநிதிகளைப் பெற போதுமானதாக உள்ளது. புத்தளம் வாக்காளர்களுடன் சேர்த்து கணக்கிட்டால் இம்முறை ஆகக்குறைந்தது ஐந்து பிரதிநிதிகளை வடமேல் மாகாணசபைக்கு அனுப்ப முடியும்.

ஆனால் பெரும்பாண்மை கட்சிகளுடன் சேர்ந்து தேர்தலில் பங்கு பற்றினால் இரண்டு அல்லது மூன்று உறுப்பினர்களையே பெற முடியும். இது வாக்குகளை வீணடிக்கும் முயற்சியாகும். புத்தளத்தைப் பொருத்த வரையில் முஸ்லிம்கள் தனியாக கேட்பதிலேயே அதிகளவு இலாபங்கள் உள்ளன. 

அதே வேளை யாழ்ப்பாண முஸ்லிம்கள் இத்தேர்தலில் எவ்வாறான முடிவை எடுப்பார்கள் என்பது சற்று சிந்திக்க வேண்டிய விடயம். யாழ்ப்பாண முஸ்லிம்கள் பெருமபாலாக வாழும் மன்னார் வீதி ஒற்றைப்பனையடி முகாம், சோல்டன் முகாம் மற்றும் தில்லையடியிலுள்ள தென்னந்தோப்பு முகாம், பரீத்தா பாத், சதாமியாபுரம், ரத்மல்யாய, சாபி நகர், அரபாநகர், அல் ஜித்தா, வை.எம்.எம்.ஏ. போன்ற பிரதேசங்களில் நிரந்தரமாகக் குடியேறிவிட்ட யாழ்ப்பாண முஸ்லிம்கள் கடந்த 23 ஆண்டுகளாக புனர்வாழ்வு நடவடிக்கைகளுக்கு உட்படுத்தப்படாமல் புரந்தள்ளப்பட்டு வாழ்கின்றனர். இவர்கள் தட்டிக்கழிக்கப்பட்ட இந்த நிலமை இந்த தேர்தலில் பிரதிபளிக்கும் என நம்பப்படுகிறது.

ஏனெனில் இந்த முகாம்களில் வாழும் யாழ்ப்பாணத்தைச் சேர்ந்த ஆறாயிரம் குடும்பங்களில் 90 சதவிகிதமானவர்களுக்கு வீடமைப்பு திட்டங்களோ வேறு உதவிகளோ வழங்கப்படவில்லை. அத்துடன் இவர்கள் வாழும் முகாம்களின் வீதிகள் கிரசர் போடப்பட்டவையாக குன்றும் குழியுமாக மிகவும் பின்தங்கிய நிலையில் காணப்படுகின்றன. இனிமேலும் வாக்குறுதிகளை நம்பி சலுகைகளுக்காக உரிமைகளை இழக்கும் ஒரு சமுதாயமாக யாழ்ப்பாண முஸ்லிம்கள் இருக்க மாட்டார்கள்.  

வடமாகாணத்திலுள்ள மன்னார், யாழ்ப்பாணம், முல்லைத்தீவு, கிளிநொச்சி மற்றும் வவுனியா மாவட்ட முஸ்லிம்கள் என்று ஒவ்வொரு மாவட்டத்தைச் சேர்ந்த முஸ்லிம்களும் பல்வேறு பிரச்சினைகளை எதிர்கொண்டுள்ளார்கள். ஆனாலும் இம்முஸ்லிம்களின் பொதுவான ஒரு பிரச்சினைகளாக இம்முஸ்லிம்களின் வீடுகள் சொத்துக்கள் என்பன அழிக்கப்பட்டுள்ளமை, அந்த இழப்புகளுக்கான நஷ்டஈடுகள் கிடைக்காமை, புனர்வாழ்வுக்கான உதவிகள் கிடைக்கப் பெறாமை, வாழ்வாதாரத்துக்கு தேவையான அடிப்படை வசதிகள் இல்லாமை போன்ற காரணங்கள் உள்ளன. 

இத்தேர்தலில் போட்டிக்கு இறங்கியுள்ள சிறுபான்மைக் கட்சிகளில் எந்தக் கட்சி முஸ்லிம்களின் பிரச்சினைகளில் ஒரு சிலவற்றையேனும் தேர்தலுக்கு முன்பு தீர்க்கின்றதோ அக்கட்சிக்கே முஸ்லிம்கள் வாக்களிப்பதற்கான சாத்தியக் கூறுகள் காணப்படுகின்றன.