ரவூப் ஹக்கீம் அமைச்சு பதவியை துறக்கவேண்டும் - ஆசைப்படும் முஸம்மில்

(ஏ.எல்.ஜுனைதீன்)

    முஸ்லிம் காங்கிரஸ் தலைவர் அமைச்சர் ரவூப் ஹக்கீம் அரசாங்கத்தில் இருந்து கொண்டு அரச பதவியையும் வகித்துக் கொண்டு தேர்தலில் தனித்துப் போட்டியிடுவதை நாம் ஏற்றுக்கொள்ளமாட்டோம். அவர் தனது பதவியைத் துறந்தே இவ்வாறு தனித்துப் போட்டியிட வேண்டும் என மேல் மாகாண சபை உறுப்பினர் முஹம்மத் முஸம்மில் தேசிய சுதந்திர முன்னணியினால் ஏற்பாடு செய்யப்பட்டிருந்த செய்தியாளர் மாநாட்டில் இக் கருத்தைத் தெரிவித்துள்ளார்.

    அவர் இது தொடர்பாக இங்கு கருத்துத் தெரிவிக்கையில் மேலும் கூறியதாவது,

    முஸ்லிம் காங்கிரஸ் தமிழ் தேசியக் கூட்டமைப்பின் பிரிவினைச் செயற்பாடுகளுக்கே துணை போகின்றது. அமச்சர் ரவூப் ஹக்கீம் தேர்தலில் தனித்துப் போட்டியிடுவதனால் அரசாங்கம் ஒரு போதும் கவிழ்ந்து விடப்போவதில்லை. ஆனால் அங்குள்ள முஸ்லிம் மக்கள் நிச்சயம் பாதிக்கப்படுவார்கள்.

    முஸ்லிம் மக்கள் அதிக அளவில் வடக்கிலேயே பாதிக்கப்பட்டனர். தமது உடமைகளையும் இருப்பிடங்களையும் இழந்து அனாதரவான இந்த முஸ்லிம் மக்களை பாதுகாக்க வேண்டிய அமைச்சர் ரவூப் ஹக்கீம் இன்று பிரிவினை கோருவோருக்கு துணை போவது முஸ்லிம் சமூகத்தையே அதிகம் பாதிக்கும்.

    வடக்கு மாகாணத்தில் வாழ்கின்ற முஸ்லிம் மக்களின் உரிமைகளைப் பற்றி அவர்கள் சிந்திக்க வேண்டிய முக்கியமான கால கட்டம் இதுவாகும். எனவே முஸ்லிம் மக்கள் சிந்தித்து செயற்பட வேண்டும். தமது உடமைகளைப் பாதுகாக்கவும் வடக்கில் மீண்டும் தமது  இருப்பினைப் பெற்றுக் கொள்வதானால் முஸ்லிம் காங்கிரஸுக்கு நல்ல படிப்பினையைக் கற்றுக் கொடுக்க வேண்டும். என்று அவர் கருத்து தெரிவித்துள்ளார்.