கெளரவமாக வாழக்கூடிய நாட்டை உருவாக்கியுள்ளோம் - ஜனாதிபதி மஹிந்த

நாம் கெளரவமாக சமாதானத்தை வெற்றி கொண்டு கெளரவமாக வாழக்கூடிய நாட்டை உருவாக்கியுள்ளோம். இந்த நடவடிக்கை எதிர்காலத்திலும் தொடரும் என  ஜனாதிபதி மஹிந்த ராஜபக்ஷ தெரிவித்தார். நாட்டைப் பிளவுபடுத்தி எல்லைகளை வகுக்க முற்படுவோரின் கனவுகள் நிறைவேற ஒருபோதும் இடமளிக்கப் போவதில்லை எனவும் ஜனாதிபதி தெரிவித்தார்.

4 கொழும்பு தெற்கு துறைமுகத்தை நேற்று உத்தியோகபூர்வமாகத் திறந்து வைத்து உரையாற்றிய போதே ஜனாதிபதி இவ்வாறு தெரிவித்தார். இந்நிகழ்வில் தொடர்ந்து உரையாற்றிய ஜனாதிபதி, 

இலங்கையை மீண்டும் தோல்வியைத் தழுவாத நாடாகவும் உலகில் முக்கிய நாடாகவும் கட்டியெழுப்ப வேண்டுமெனில் துறைமுகத்தை மையமாகக் கொண்ட பொருளாதார முறைமை கட்டியெழுப்பப்பட வேண்டியது முக்கியமாகும்.

பயங்கரவாதத்திலிருந்து இந்த நாட்டை மீட்க முடியும் என நாம் நினைத்திருக்கவில்லை. நாட்டின் எதிர்காலம் குறித்து இந்தளவு தீர்க்கமாக எந்த தலைவரும் சிந்தித்திருக்கவுமில்லை.  அன்றிருந்தவர்கள் தம்மை மரணத்திலிருந்து பாதுகாத்துக் கொண்டு புலிகளிடமிருந்த துறைமுகங்களையும் கப்பல்களையும் மீட்பது சம்பந்தமாகவே சிந்தித்தனரே தவிர துறைமுகம் அமைப்பது பற்றியல்ல. 

விமான நிலையங்களைப் பாதுகாப்பது எப்படி என சிந்தித்தார்களே தவிர புதிதாக எதையாவது உருவாக்கலாம் என சிந்திக்க நேரம் இருக்கவில்லை. எதிர்கால எதிர்பார்ப்புகள், அபிவிருத்திகள், அபிலாஷைகளுக்கு நங்கூரம் போடப்பட்டிருந்த யுகம் அது.

இந்த துறைமுகத்தில் உலகில் இப்போதுள்ள மிகப்பெரிய கப்பலும் எதிர்காலத்தில் அமைக்கப்படும் பாரிய கப்பல்களும் இந்த துறைமுகத்திற்குள் பிரவேசிக்க முடியுமான வகையில் பிரமாண்டமாக இத்துறைமுகம் நிர்மாணிக்கப்பட்டுள்ளது.

சிலர் இவற்றைக் கண்டு பொறாமைப் படுகின்றனர். இவற்றை விற்றுத்திண்ண முடியுமா என யோசிக்கின்றனர். நாட்டைச் சுற்றி துறைமுகங்களை அமைத்தாலும் வாய்களை மூடி வேலி போட இயலாது.

1957 இல் நிர்மாணிக்கப்பட்ட பண்டாரநாயக்க சர்வதேச விமான நிலையம் உடனே பலன் தரவில்லை. இப்போதுதான் அதன் பலனை அனுபவிக்க முடிகிறது. அதேபோன்று எதிர்காலத்திற்காகவே நாம் அனைத்தையும் முன்னெ டுக்கின்றோம்.  இப்போது துறைமுகத்தின் வருமானம் 4,000 கோடியாகவுள்ளது. 2020 இல் இதனை 10,000 கோடியாக்குவதே எமது இலக்காகும்.