வடமாகாண சபையில் தனித்தே போட்டி - உயர்பீடக் கூட்டத்தில் மு.கா. திட்டவட்டம்

வடமாகாண சபையில் மஸ்லிம் காங்கிரஸ் தனித்தே போட்டியிடுமென்ற தீர்மானம் முஸ்லிம் காங்கிரஸ் உயர்பீடக் கூட்டத்தில் மீண்டும் உறுதி செய்யப்பட்டுள்ளதாக அக்கட்சியின் செயலாளர் நாயகமும், பாராளுமன்ற உறுப்பினருமான ஹசன் அலி ஜப்னா முஸ்லிம் இணையத்திடம் தெரிவித்தார்.

அமைச்சர்கள் ரவூப் ஹக்கீமும், றிசாத் பதியுதீனும் சந்தித்துக் கொணடதையடுத்து வடமகாண சபையில் மாத்திரம் முஸ்லிம் காங்கிரஸ் அரசாங்கத்துடன் இணைந்து போட்டியிடுமென தகவல்கள் வெளியாகியிருந்தன.

இருந்தபோதும் வெள்ளிக்கிழமை மஹ்ரிப் தொழுகையின் பின்னர் கூடிய முஸ்லிம் காங்கிரஸின் உயர்பீடக் கூட்டத்தில் வடக்கு, மத்திய மற்றும் வடமேல் மாகாண சபைகளில் முஸ்லிம் காங்கிரஸ் தனது மரச் சின்னத்தில் தனியே போட்டியிடுமென முன்னயை உயர்பீடக் கூட்டத்தில் மேற்கொள்ளப்பட்ட தீர்மானம் மீண்டும் உறுதி செய்யப்பட்டதாகவும், அந்த அடிப்படையில் வடமகாண சபையில் அரசாங்கத்துடன இணைந்து கேட்க எத்தகைய வாய்ப்புகளும் இல்லையெனவும் ஹசன் அலி திட்டவட்டமாக கூறினார்.

அத்துடன் வடமாகாண சபை தேர்தலில் பொதுச் சின்னத்தில் போட்டியிட தாம் இன்னும் தயாராகவிருப்பதாகவும், அதற்காக அரசாங்கத்துடன் இணைந்து போட்டியிட தயாரில்லையெனவும் ஹசன் அலி மேலும் கூறினார்.

அதேவேளை 3 மாகாண சபைகளிலும் தம்முடன் இணைந்து போட்டியிட வருமாறு அரசாங்கத்திடமிருந்து அழைப்பு வந்துக் கொண்டிருப்பதாகவும் எனினும் தனியாக போட்டியிடுவது என்ற முஸ்லிம் காங்கிரஸின் நிலைப்பாட்டில் எத்தகைய மாற்றமும் இல்லையெனவும் ஹசன் அலி  உறுதிபடத் தெரிவித்தார்.