பிரதியமைச்சர் அப்துல் காதரின் நீதிமன்ற முறைப்பாடு - ஐ.தே.க. செயற்குழுவிற்கு தடையுத்தரவு

ஐக்கிய தேசிய கட்சியின் தலைவர் ரணில் விக்கிரமசிங்க, பொதுச் செயலாளர் திஸ்ஸ அத்தநாயக்க மற்றும் அந்த கட்சியின் செயற்குழுவிற்கு எதிராக இடைக்கால தடையுத்தரவு பிறப்பிக்கப்பட்டுள்ளது.

எதிர்வரும் ஆகஸ்ட் மாதம் 8 ஆம் திகதி வரை அமுலாகும் வகையில் இந்த இடைக்கால தடையுத்தரவை கொழும்பு மாவட்ட நீதிமன்றம் பிறப்பித்துள்ளது.

சுற்றாடல்துறை பிரதியமைச்சர் அப்துல் காதரினால் தாக்கல் செய்யப்பட்ட முறைப்பாடு ஒன்று விசாரணைக்கு எடுத்துக் கொள்ளப்பட்ட போதே இந்த உத்தரவு பிறப்பிக்கப்பட்டுள்ளது.

ஐக்கிய தேசிய கட்சியில் இருந்து அரசாங்கத்துக்கு சென்ற நாடாளுமன்ற உறுப்பினர் அப்துல் காதருக்கு எதிராக இன்றைய தினம் ஒழுக்காற்று விசாரணைகள் இடம் பெறவிருந்தன.

இன்றைய தினம் ஒழுக்காற்று விசாரணைகள் நடைபெறுவதாக அறிவிக்கப்பட்டிருந்ததுடன், நாடாளுமன்ற நாட்களில் அவ்வாறான செயற்பாடுகளை மேற்கொள்வது ஏற்புடையதல்லவென முறைப்பாட்டு தரப்பினரால் சுட்டிக்காட்டப்பட்டுள்ளது. இதனையடுத்தே, இந்த இடைக்கால தடையுத்தரவு பிறப்பிக்கப்பட்டுள்ளது.