'அரசியல்வாதிகளாகிய நாம் மெளனிகளாக இருப்பது முஸ்லிம்களுக்கு செய்யும் துரோகம்'

(ஏ.எல்.ஜுனைதீன்)

    ஊடகமயப்படுத்தலில் மக்கள் இன்று வேகமாக முன்னேறி வருகின்றனர் இணையத்தளங்களும் அச்சக ஊடகமான செய்திப் பத்திரிகைகளும் உடனுக்குடன் செய்திகளைத் தருவதுடன் தம்மால் தெரிவு செய்யப்பட்ட அரசியல்வாதிகள் எவ்வாறு நடந்து கொள்ள வேண்டும் என்பதற்கான எத்தனங்களையும் பரிமாறி வருகின்றன. இவ்வாறான வேகமான செயல்பாட்டின் தாக்கத்தில் அரசியல்வாதிகளான நாம் வேகம் குறைந்து செயல்படுவது ஆரோக்கியமற்ற ஒன்றாகும் என திகாமடுல்ல (அம்பாறை) மாவட்ட முஸ்லிம் காங்கிரஸ் பாராளுமன்ற உறுப்பினரும் கல்முனைத் தேர்தல் தொகுதி அபிவிருத்தி ஒருங்கிணைப்புக் குழு தலைவருமான சட்டத்தரணி எச்.எம்.எம்.ஹரீஸ் அண்மையில் மருதமுனையில் ஏற்பாடு செய்யப்பட்டிருந்த நிகழ்வொன்றில் பேசுகையில் தெரிவித்துள்ளார்.

   பாராளுமன்ற உறுப்பினர் சட்டத்தரணி ஹரீஸ் இங்கு தொடரந்தும் பேசுகையில் மேலும் குறிப்பிட்டதாவது,

   இன்று முஸ்லிம்கள் பேரினவாத தரப்புக்களால் பல்வேறு அநீதிகளுக்கு உட்படுத்தப்பட்டு வருகின்றனர். இந்த நிலை நாளுக்கு நாள் குறைவின்றி அதிகரித்த வண்ணமே சென்று கொண்டிருக்கிறது.இப்படியான சூழ் நிலையில் அரசியல்வாதிகளாகிய நாம் மெளனிகளாக இருப்பது முஸ்லிம் சமூகத்திற்குச் செய்யும் துரோகமும் அநியாயமுமாகும். இதனை எம்மைப் படைத்த இறைவனும் அங்கீகரிக்கமாட்டான்.

   முஸ்லிம் சமூகம் பாதிப்புக்குள்ளாகும்போது எமது உணர்ச்சிகள் உறங்கி விடுவதில் எதுவித அர்த்தமும் கிடையாது. அபிவிருத்தி என்ற மாயையால் உரிமை என்ற விடயத்திற்கு அபிவிருத்தி என்னும் முடிச்சுப் போட்டு விட யாரையும் நாம் அனுமதிக்க முடியாது. எமது உரிமைகள் விடயத்தில் எமக்குள்ள வேறுபாடுகளைக் கலைந்து சிந்தித்து செயல்பட வேண்டிய காலம் வந்துவிட்டது. அபிவிருத்தி என்பது மக்களின் தேவையாக இருந்த போதிலும் அந்த அபிவிருத்திக்காக மக்களின் உரிமைகளை விட்டுக் கொடுக்க நாம் தயாரில்லை. இவ்வாறு அவர் கூறினார்.