சொரணையே இல்லாத சோனகனை சந்திப்போம்.. வாருங்கள்...!!

(ரவுப் ஹஸீர்)

தம்புள்ளை தொட்டு

மஹியங்கனை வரை

எவ்வளோவோ நடந்து விட்டது .

அரசியல் தலைவர்களையும் ,

ஜெம்மியதுல் உலமாவையும்

நாம் நிறையவே

திட்டித் தீர்த்தாகி விட்டது .

இவர்களை எல்லாம் இனி

நம்பிப் பயனில்லை .......

என்று சலித்து .....

நாமாகவே ....

என்று வீராப்பு பேசவும்

ஆரம்பித்தாகிவிட்டது .

 போதாக்குறைக்கு -

" வரட்டுமே , வாக்குக் கேட்டு....

படிப்பிக்கிறோம் பாடம் ! "

என்றெல்லாம் சட்டை கைகளையும்

மடிக்க தொடங்கியாகிவிட்டது .

தன்னைத் தவிர மற்ற அனைவருமே

இஸ்லாமியப் பற்றற்றவர்கள் என்று

முத்திரை குத்துகிறவாறு

குற்றம் சாட்டியும் ,

குத்திக்காட்டியும்

முகநூலில் நிறையவே எழுதியுமாகிவிட்டது .

தேர்தலில் நிற்காத அரசியல் கட்சி வைத்திருப்பவர்கள் ;

அறிக்கை மேல் அறிக்கை எழுதி

பத்திரிகைகள் ,

இணையத்தளங்கள்

எதனையும் விடாது - அவற்றை

மகா ஜனங்களின் பார்வைக்கு

சமர்ப்பித்துமாகிவிட்டது !

புதுக்கட்சிக் காரர்கள் ,

கிடைக்கிற மேடைகளில் எல்லாம்

ஏறி ஏறி ,

ஒலி வாங்கி   ,

விழி பிதுங்க -

பார்வையாளர்களின் காதுச் சவ்வை

கிழி கிழியென

கிழித்துமாகிவிட்டது !

எதுவுமே இன்னும்

முடிவுக்கு வரவில்லை .

எல்லாம் அதைப் போலவே ,

அல்லது அதனை விடவும்

அதிகமாகவே

நடந்து கொண்டிருக்கிறது .

போதாக்குறைக்கு

" தொப்பிபோட்ட குப்பியொன்று

துளிர் விடா வயதுத்

துறவி மீது கொட்டியதால்

காவி உடைமீது

கறை கவிழ்ந்த  

காவியத்தை ,

பெரும்பான்மை தோட்டத்து   

எட்டு முகை அவிழாத

மொட்டொன்றில்

தம்பி(யா)த் தும்பி

தேன் குடித்த

தேள் கதையை ,  

.....................................................................

பென்னாம் பெரீய்ய

பாதாளம் எட்டுகிற

பாதகத்தை  எல்லாம்

கபனிட்டு ,

நிகாப் உடுத்தி ,

ஊத்த நாத்தம்

ஊடகத்திற்கு கசியாமல்

போ(ர்)த்திவைச்சி

காத்தவன் நான் ,

பள்ளி உடைப்பு ,

பள்ளி அடைப்பு

என்கிற

பூச்சிகளையெல்லாம் - ஏன்

பூதமா(க்)க பார்க்குறீங்க ? " - என்று

புத்திமதிப் புத்தகமும்

அச்சாகிவிட்டது .

இப்போது ........

இவை எல்லாம் முடிந்த பிறகு ,

இன்னும் ஒரே ஒரு வேலைதான்

பாக்கி இருக்கிறது ! 

இந்த

திட்டித் தீர்த்தவர்கள் ,

சவால் விட்டவர்கள் ,

சட்டைக் கையை மடித்துக்கொண்டு

சண்டித்தனம் செய்ய தயாராகிறவர்கள் ,

ஒலிபெருக்கி வெடிக்க கத்தியவர்கள் ,

அறிக்கை மேல் அறிக்கை விட்டவர்கள் .......

இன்னும் இன்னும் இத்தியாதி

மேதாவிலாசத்திற்கு உரித்துடையவர்கள்.....

எல்லோருமே ஆவலுடன் ,

அதுவும் பேராவலுடன்

காத்துக்கொண்டிருக்கிறார்கள் ..........

இன்று வரும் ,

நாளை வரும்

என்று ஒவ்வொரு நாளும்

தபால்காரனின் மணியோசைக்காக

ஏங்கித் தவம் கிடக்கிறார்கள் ....

அந்த

அழைப்பிதலுக்காக !

எந்த

அழைப்பிதலுக்காக ?

எதற்கு ... எதற்கு......

வேறு எதற்குமல்ல .....

வரிசையிலே வந்து ,

மாளிகையின் வாசலில்

மணிக்கணக்கில் வெந்து ,

சர்வாங்கம் முழுவதும் 

சல்லடை இடப்பட்டு ,

சட்டை மேலே அதற்கான

முத்திரை ஒட்டப்பட்டு

அதன் பிறகு

சொர்க்கத்திற்குள் போனதுபோல - ஒரு

சுகானுபாவத்துடன் சொக்கி ........

கஞ்சி குடிக்கத்தான் !

எதற்கு......வேறு எதற்கு ?

சொரணை உள்ள

சோனகன் போவானா ?