இப்தார் யாருக்காக..?

(Dr. N. Ariff)

நான் மார்க்க அறிவில் முதிர்ச்சி பெற்றவனல்ல. எனக்கு கண்முன்னே தெரிகின்ற சில விடயங்களை ஆதங்கத்துடன் கூற முனைகின்றேன். தவறிருந்தால் மன்னித்து விடுங்கள். 

நாங்கள் புனிதமான, மகத்துவமிக்க ரமழானின் பாதியைக் கடந்து இன்னும் எஞ்சிய நாட்களை இன்ஸாஅல்லா கடக்கவிருக்கின்றோம். நாங்கள் செய்கின்ற நல்லமல்கள் இறைவனின் பொருத்தத்தைப் பெறக்கூடியதாக இருக்கவேண்டும் என்பதில் மாற்றுக்கருத்து இருக்கமாட்டாது என நம்புகின்றேன்.

இம்முறையும் புனித ரமழான் நோன்பு ஆரம்பித்த  நாளில் இருந்து தனிப்பட்ட முறையிலும் பொது நிறுவனங்களாலும் தினமும் இப்தார் நோன்பு திறப்பிக்கும் நிகழ்வுகள் நடைபெறுகின்றன. இவற்றால் உண்மையில் நாங்கள் இறைவனின் பொருத்தத்தைப் பெறுகின்றோமா? இந்த இப்தார் நிகழ்வுகளில், நோன்பு திறக்க வசதியற்ற எத்தனை ஏழைகள் கலந்துகொள்கிறார்கள்? பெரும்பாலும் இல்லை என்றே கூறலாம்.

இப்தார் நிகழ்வு இன்று ஒரு பெருமைக்குரிய சடங்காக மாறிவிட்டதோ என எண்ணத்தோன்றுகின்றது. இப்தார் நிகழ்வில் பங்குபற்றுவோரின் நிரலைப்பார்த்தால் அனைவரும் உயர்ந்த பதவி வகிப்பவர்களும், வசதி படைத்த செல்வந்தர்களும் தான் இருப்பார்கள். வசதியற்ற ஏழைகளைக் காணவே முடியாது. ஏட்டிக்குப் போட்டியாக மாறி மாறி தினமும் இப்தார் நடக்கின்றது. உண்மையில் இதில் ஏதும் நன்மை கிடைக்குமா? 

பெரும்பாலான இப்தார் நிகழ்வுகள் பொது நிறுவனங்களின் அனுசரணையுடன் நடாத்தப்படுகின்றன. அதாவது பொதுப்பணம் விரயமாக்கப்படுகின்றது. நோன்பு திறக்க வசதியற்ற ஏழைகள் இல்லாத இப்தார் நிகழ்வுக்கு செலவாகும் பணத்தை மொத்தமாக ஒரு ஏழைக்குடும்பத்துக்கு வழங்கினால் நன்மையாக இருக்காதா? இறைவனின் மிகவும் பொருத்தத்தைப் பெறாதா?  

அல்லது இப்தார் நடாத்துபவர்கள் நோன்பு திறக்க வசதியற்ற ஏழைகளையும் சேர்த்து நடாத்த முயற்சிக்க வேண்டும். நாங்கள் நோற்கும் நோன்பை அங்கீகரித்து ஏற்றுக்கொண்டு, நாங்கள் நல்லமல்கள செய்யவும் எங்களுக்கு அருள்புரிவானாக! ஆமீன்!