முதுகெலும்பில்லாதவர்களின் பின்னால் பயணிக்கும் முஸ்லிம் சமூகம்..!

(அல்மாஸ்)

நாட்டில் என்ன நடக்கிறது என்பது அநேகர்களுக்குத் தெரியாது. அவர்களுக்குத் தெரிந்ததெல்லாம் பணமும், பட்டமும் மாத்திரமே. என்ன செய்தாவது சுகபோக வாழ்க்கை வாழ்வதற்காக ஓடோடி உழைத்து பணத்தைத் தேடினால் போதும் என்ற மனப்பாங்கில் ஒரு கூட்டம். இருக்கும் பதவியிலிருந்து யாரையாவது வெட்டி வீழ்த்த்தி விட்டு எவர் காலைப் பிடித்தாவது உயர்பதவியை அடைய வேண்டுமென்று சதா சிந்திக்கும் மற்றுமொரு கூட்டம். 

தஹ்வா பணியில் ஈடுபடுகிறோம் என்று சொல்லிக்கொண்டு கிணற்றுத் தவளைகளாய் தகவல் தொடர்பு சாதனங்களின் எவ்வித தொடர்புமில்லாமல் தெரியும் இன்னொரு கூட்டம், மக்களை விழிப்படையச் செய்யாது, அவர்களுக்கு உரிய நேரத்தில் உரிய சாதனங்களினூடாக விடயங்களைத் தெளிவுபடுத்தாது, தமது பேனா முனைகளால் வெறும் கற்பனை கொண்டு கவிதைகளயும் கதைகளையும் எழுத்திக் கிழித்துக் கொண்டிருக்கும் இன்னுமொரு கூட்டம். இவ்வாறு இன்னும் இன்னும் பல  கூட்டங்கள் முஸ்லிம் சமூகத்தில் உள்ளனர். இவர்கள் தாங்களும் தங்கள் வேளைகளும் என்று திரிந்து கொண்டிருக்கும் நிலையில் இக்கூட்டங்களையெல்லாம் மடையர்களாக்கி, இக்கூட்டங்களின் மீது சவாரி செய்து, அரசியல் பிழைப்பு நடத்தும் முதுகெலும்பில்லாத கோழை அரசியல் தலைமைகளையும், இருக்கும் உறுப்பினர்களை மடையர்களாக்கி, அவர்களைச் சிந்திக்கச் செய்யாது, அவர்களின் புதிய சிந்தனைகளுக்கு மதிப்பளிக்காது, நானே ராஜா நானே மந்திரி என்ற நிலையில் வளம் வரும் சபைகளின் தலைவர்களையும் இன்னும் எவ்வளவு காலத்துக்கு நாம் நம்பியிருக்கப்போகிறோம் இந்நாட்டில் நாம் எதிர்நோக்கி இருக்கும் நெருக்கடிகளுக்கு இவர்கள் தீர்வைப் பெற்றுத் தருவார்கள் என்று. ஏமாந்த காலமும் ஏமாற்றி காலமும் போதும். இனியும் நாம் ஏமாந்து கொண்டிருக்க முடியாது?

மகியங்கனைப் பள்ளிவால் மூடப்பட்டு ஒரு வாரம் கடந்துவிட்டது. இந்த ஒரு வார காலத்துக்குள் இப்பள்ளிவாசலைத் திறந்து அதில் தொழுகை நடத்த எந்நவொரு அரசியல் தலைமையினாலோ, சபைத் தலைவர்களாலயோ முடியவில்லை. எதிர்வரும் 2ஆம் திகதி பொதுபல சேனாவினால் நடத்தப்படவுள்ள மாபெரும் பேரணியின்போது இப்பள்ளிவாசலுக்கு என்ன நடக்கும் என்ற அச்சத்தில் மகியங்கனையிலுள்ள முஸ்லிம்கள் உள்ளனர். 

அது ஒரு புறமிருக்க, இதுவரை இப்பள்ளிவாசலின் தற்போதைய நிலை என்னவென்பதை எத்தனை அரசியல் தலைமைகள் நேடியாகச் சென்று பார்த்திருப்பார்கள். சமூக ஒற்றுமையை வலியுறுத்தி 'இப்தார்' எனும் பெயரில் பணத்தை வீண்விரையம் செய்து, சுய விளம்பரம் தேடும் அமைப்புகளின் தலைவர்களில் எத்தனைபேர் இப்பள்ளிவாலையும் அதைச் சூழுவுள்ள முஸ்லிம்களையும் சென்று பார்த்திருப்பார்கள். நீங்கள் பெயருக்காகவும் பெறுமைக்காவும், போட்டிக்காகவும், சுயவிளம்பரத்துக்காகவும் செய்கின்ற இந்த இப்தாரினூடாக இதுவரை நீங்கள் அடைந்துகொண்ட சமூக ஒற்றுமை எவை? சமூக இணக்கபாடு எவை? எத்தகைய உண்மையான புரிந்துணர்வை பிற மதத்தவர்களிடமிருந்து நீங்கள் பெற்றிருக்கிறீர்கள். சமூக ஒற்றுமைக்காக மேற்கொள்ளும் உங்களது இப்தாருக்கு வந்த பிறமதத்தவர்களைக் கொண்டு சமூக ஒற்றுமையை வலியுறுத்தி மகியங்கனையில் ஒரு அமைதி ஊர்வலத்தை நடத்த முடியுமா? 

கேவலம் தலைநகர் கொழும்பிலாவது பள்ளிவாசலைத் திறக்கக் கோரி உண்மைக்கு உண்மையாக சமூக ஒற்றுமையுடையவர்களைக் கொண்டு ஒரு போரணியை நடத்த முடியுமாறு. குறைந்த பட்சம் சமூக ஒற்றுமை சமூக ஒற்றுமை என்று வருடா வருடாம் நீங்கள் நடத்தும் இப்தாருக்கு வந்த பிற மதத்வர்கள் ஆயிரம் பேரிடமாவது மகியங்கனைப் பள்ளிவாசலைத் திறக்கக்கோரி கையெழுத்துக்களைக் பெற முடியுமா? யாரை நீங்கள் ஏமாற்றுகின்றீர்கள்?

இன்று நமது சமூகத்தில்  குடியிருக்க வீடு இல்லாத, குடிக்கத் தண்ணீர் வசதியில்லாத, கழிவகற்ற கழிவறை இல்லாத, வெளிச்சத்துக்கு மின்சாரமில்லாத, கல்விக்குச் செலவழிக்கப் பணமில்லாத, ஒரு வேளைச் சோற்றுக்கு வழியில்லாத எத்தனை எத்தனை ஆயிரம் மக்கள் அவதிப்படுகிறார்கள். புனித ரமழான் மாதம் பிச்சைக்காரர்களின் மாதம் என்று பிற மதத்தவர்கள் சொல்லும் அளவுக்கு கடை, கடையா, வீடு வீடாக, தெருத்தெருவாக ஏழை முஸ்லிம்கள் அழைந்து திரிவதை நீங்கள் காணவில்லையா? இவர்களின் வாழ்வில் ஒளியேற்றுவது யார். 

நீங்கள் இந்த நோன்பு நாட்களில் வெறும் பெறுமைக்கும் சுய விளமபரத்துக்குமாக இப்தார் எனும் பெயரில் வீண்விரையம் செய்யும் பணத்தினால் ஒரு குடும்பத்துக்காவது மின்சார வசதியை ஏற்படுத்திக் கொடுக்க முடியாதா அல்லது மலசல கூடத்தைக் கட்டிக்கொடுக்க முடியாதா? அல்லது குடி நீர் வசதியை ஏற்படுத்திக்கொடுக்க முடியாத? அல்லது கல்வி கற்பதற்கு பணமில்லாது திண்டாடும் மாணவன் ஒருவனுக்கு புலமைப் பரிசில் வழங்க முடியாதா? ஏன் உங்களால் சிந்திக்க முடிவிதில்லை. வீண்விரையம் செய்வதற்காக, சுய விளம்பரத்துக்காக போட்டிபோட்டு இப்தார் செய்யும் நீங்கள், உங்களை சுவர்க்கம் இட்டுச் செல்லும் நிலையான தர்மத்தை செய்வதற்கு போட்டி போடாமல் இருப்பதேன். அல்லாஹ்வைப் பயந்து கொள்ளுங்கள. 'உண்ணுங்கள் பருகுங்கள் வீண்விரையம் செய்யாதீர்கள்' என அல்குர்ஆண் கட்டளையிடுகிறது.

அவை அவ்வாறு இருக்கையில், நேற்றுக்களில் நாம் நிம்தியாக இந்நாட்டில் வாழந்;தோம். ஆனால் நாளைய நாட்களில் முஸ்லிம் சமூகம் இந்நாட்டில் சுய கௌரவத்துடனும் சுதந்திரமாகவும் வாழ வேண்டுமாயின் உண்மைக்குண்மையாக சமூகத்துக்காக குரல் கொடுக்கக் கூடிய, உரியவாறு சமூகத்தின் பிரச்சினையைத் தீர்த்து வைக்கக் கூடிய, சமூகம் எதிர்நோக்கும் சவால்களுக்கு இராஜதந்திர ரீதியில் முகம்கொடுத்து வெற்றி காணக் கூடிய, புதிதாகச் சிந்தித்து திட்டமிட்டு செற்படக் கூடிய தலைமைத்துவம் மிக அவசரமாகவும் அவசியமாகவும் நம் சமூகத்தில் இனங்காணப்படுதல் அவசியம்.

எவ்வித சுயநலமுமற்ற, சகலவற்றிலும் தன்னிறைவு கண்ட, சமூகத்துக்காகக் சதா சிந்திகக் கூடியவர்கள் நம்மத்தியில் இல்லாமலில்லை. ஆனால் அவர்கள் தங்களை இனங்காட்டாமல் உள்ளனர். அல்லாஹ்வுக்காகவும் சமூகத்துக்காகவும் எதிர்கால நமது தற்போதைய குழந்தைகளுக்காகவும் இத்தகையவர்கள் முன்வந்து சமூகத்தை வழி நடத்த வேண்டும். அவர்களோடு நாம் ஒன்றிணைய வேண்டும். அவர்களின் கரங்களை நாம் பலப்படுத்த வேண்டும். அதற்கான முயற்சிகளை ஒவ்வொருவரும் தங்களது சக்திக்குட்பட்ட வகையில் மேற்கொள்ள வேண்டும. வெறுமனே, தற்போதுள்ள முதுகெலும்பற்ற அரசியல் தலைமைத்துவங்களின் பின்னாலும் கூஜாத்தூக்கிகளாக செயற்படும் சபைத் தலைவர்களின் பின்னாலும் நாம் பயணித்து நமது காலத்தை வீணடிப்பதில் எதையும் அடைந்துவிட முடியாது என்பதை நெஞ்சில் நிறுத்திச் செயற்படுவோமாக! வல்ல அல்லாஹ் நமக்கு அருள் புரிவானாக!